Delhi nung ‘Destination Northeast 2016’ kanga takok ngua amunger

New Delhi, Feb. 13 (Agencies) : Hokolbar nungi Pragati Maidan, Delhi nung tenzüka anogo asemnü ‘Destination Northeast 2016’ benjung nung bendangertem aser linük nung alir nisung aika arua shilem agidar.
Destination North East benjung ya DoNER Ministry ajanga ayongzüker aser iba nung central ministry aikati northeast nung parnoki mapa inyakbatem sayur. Iba benjung ya tourist aser investor tem atsür arutsü atema aser ano India aser North East (NE) region tsüngda tesentaktep akangshitsü nükjidong nung ayongzüker.
Hokolbarnü Assam & Nagaland Angh, P.B Acharya-i sobaliba sentong nung tongti tesemdanger ama shilem agi.
“NE tesem nem Tsüngremi ali rongsen aser chiyungtsü tajung aika moaja lir. Ajisüaka, külen tsütsü dang asüba ajanga iba tesem nung terenlok mali. NE nungi lanurtem yangi azüngtsü aser mapa inyaktsü atema arua alir. India kübok tesem balala nung alirtemi NE tesem semdangtsüla aser kati ka indang tamangba yimsü aser sobalibatem metettsü merangtsüla, kechiyong iba jagi linük akangshitsü” ta Angh Acharya-i ashi.
Sentong nungsa Jt. Secretary DONER, Arvind Madhav Singh-i ashiba agi, North East nung inyaktettsü aliba mapatem aser maparen sayutsü atema iba benjung ayongzüka amunger.
Ano, iba benjung ajanga onoki nübortem dang north east tesem nung sobaliba takar sayutsü meranger, ta paisa shisem.
“Delhi nung alirtem dang North east nung alirtem chichiba nung sayutsü maongka anguba atema kanga pelar” ta North East Zone Cultural Centre (NEZCC) Director, Lipokmar Tzudir-ia ashi.
“North East tesem nung alirtem indang osang balala prokshia lir aser iba benjung amungba ajanga linük yimtiba nung alirtem north east nübortem indang osang chichiba metetdaktsütsü nükjidong lir” ta paisa ashi.