Mapa tajung ajakji sentong kanga junga atongba ajanga lir : TR Zeliang

Dimapur, February 13 (TYO): February 13, 2016 nü Peren district kübok Gailinamdi yimtsüng lapoktsüba sülen Nagaland Chief Minister, T.R. Zeliang-i “Mapa tajung ajakji sentong kanga junga atongba ajanga lir,” ta ashi.
TR Zeliang-isa, “Iba yimtsüng ya ‘model village’ ka ama lir anungji yimdaklirtemi sentong tajung yanglua yim yangertettsü ayongzüker,” ta ashi.
Sorkari dangbo model village kümdaktsütsü makok saka sorkar aser yimdaklirtem külemi inyak nungdang ibaji koktettsü. Sorkar ket nung yimer lushi aser alinük madak tashi mali saka asenok külemi item asoshi sentongtem atongtettsü, ta Chief Minister-isa ashi.
Tanü yimtsüngtem nunga nütsüng timba renloka aoer aser asenoki tang yim tasen atema sentong atonga meyura, tarutsü nung timtem ajurutsü. Yim nung merükmeju alitsüla aser gari lenmang sendakteptsüla aser yimdaklirtemia senso tajung ka ama yimya-awashi meteta alitsüla. Itemji ‘model village’ asoshi kanga tongtibang lir, ta TR Zeliang-isa ashi.
Iba sentong nung Nagaland Home Minister, Y. Patton-ia yimdaklirtem dang sorkar den amalitepa terenlok mapa inyaktsü ayongzük aser RD Minister, C.L. John-i tarutsü nung mepetmesü madoktsü atema yimdaklirtem angatettepa sentongtem yanglutsü tayongzükba agütsü.
Sentong nung Peren Deputy Commissioner, Peter Lichamo-ia o tatsüka jembidang, sorkari mapa tatsüka tsüngda yim tasen ‘recognition’ asüba atema pelaba metetdaktsü.
Iba yimtsüng ya tesem tajung nung kümteta lir aser iba jagi Peren district nung model village ka akümtsüji kanga temsüa lir, ta Peter Lichamo-isa ashi.
Tanü tongti tesemdanger TR Zeliang-isa yim süngküm lapoktsü aser Zeme Literature Handbook sayatsü. Sentong nung Health & FW Minister P. Longon, Power Minister Kipili Sangtam, PWD (R&B) Minister Vikheho, SP Peren aser sorkar ketdangser aika aden.