Tir dang Angh balaka meshitsü: Gogoi

Guwahati, February 13 (Agencies): Hokolbarnü Guwahati nung Assam Chief Minister, Tarun Gogoi-i, state asoshi Angh ka shimtsü atema benokba onük nung Centre sorkari ola madoker, anungji pai iba onük ya Tir, Pranab Mukherjee matsüngdang benoktsü, ta metetdaktsüogo.
Guwahati nung sangdong ka ajanga Tarun Gogoi-i, “Onoki Ato kilonser Narendra Modi dang Assam state Angh balaka shimtsü atema aiben mepishiogo, saka pai iba onük nung ola madoker,” ta ashi.
Tesüiba küm ka tashi Nagaland Angh, P B Acharya-i Assam Angh repsema inyaka arur.
“Iba atema tekaraba nung kecha meinyakra, onoki iba onük ya India Tir matsüngdang benoktsü,” ta Gogoi-isa ashi.
Chief minister-isa, “State atema Angh balaka meshimtsüba ajanga Centre-i state dang tim masüba tulu ka inyakogo, aser Assam ama ‘sensitive’ state ka nungbo state atema meja-meja Angh ka alitsüji kanga tongtibang,” ta ashi.