China-i tangari ashioktsür tem nem online sabang ka lapoktsüogo

Beijing, February 14 (Agencies): China public security ministry ajanga tangari ashiokja mesüra külakzüka agir timtema alirtemi parnok timtem lemsateptettsüsa online nung sabang ka lapoktsüogo, ta Deobarnü osangbenertemi metetdaktsü.
Iba inyakyim ya online ajanga sen mapa balala inyakba, Ezubao company nung tim masü inyakba kar putetba sülen lapokerba lir, ta EFE osang ajanga ashi.
Ezubao company ajanga investor parnok 900,000 dang nungi sen dollar billion tenet (7) saruteta lir. Ezubao ya taila investment company ka lir aser parnoki sen aika meyipa agütsütsü ta tenangzükba tiyazü agütsür internet ajanga sen aika sarur. Parnoki sarutetba sen ji parnok director tem lemsa-a agir aser ano nisung tasen anioktsü mechi nung mezüng sarutetbatemji investor tasen kar nem parnoki nangzükba ama agüja sayur.
Parnok inyakyim ya February 1, 2016 nü temai adok aser iba dak sentakba nung parnok nisung 21 pua lir. Ezubao ya linük nung kanga nüngtugu süa meteta aliba company ka lir anungji parnoki mapa tamajung inyakba putetba ajanga linük rangben kanga aoksatep.
Iba company ya 2014 küm July ita nung lapokba lir aser parnok par company ajungketba maparen kanga nendaka inyakba ajanga China nung nüburtemi kanga sapua kara nüngtugu aküm.
Ministry-i ashiba agi, tan lapokba online sabang ajanga Ezubao company-i külakzükertem nem May 13, 2016 nü tashi iba website ajanga parnok dak atalokba osang agütsütettsü aser item osang dak ajemdaker bushisüngdang mapa tenzüktsü.
Item nisungtemi agütsüba osangtemji kanga junga asadanga reprangdanger külen shitak süra parnok nem parnoki enokba sen meyipa agütsütsü merangtsü.
Kasa website ya ano ibala mesükba lendongi air tasenpur temia amshitettsü.