ISIS telungpurtemi Ramadi nungi ajendang tetsür ama sobu

Baghdad, February 14 (Agencies) : Ramadi yimti nungi jena aotsü mechi nung bangsemo ongtoker tetsür ama sobur aliba ISIS telungpur telok ka Iraq sepaitemi pua lir.
“Ramadi yimti nungi jena aotsü mechi nung ISIS züngsemtemi parnok bangsemo ongtok aser tetsür ama sobur onok ashioktsütsü merang, ajisüaka parnok ajak yimti atena maodangsa pua lir,” ta Iraq security command-i ashiba ARA News ajanga metetdaktsü.
Anbar province yimtiba Ramadi yimti ya ISIS telungpur nungi kümzüka aliba yimti ka kümogo ta Iraq sepaitemi Mongulbarnü metetdaktsüogo.
Ramadi yimti Iraq sepaitemi amanglemba sülen ISIS züngsem aika iba yimti nungi madokteti jenshidar, ta kasa osang ajanga ashi.
Iraq sepaitemi ISIS telungpur bushiba maparen dak sentakba nung iba yimti anasa aliba tesem aika mita reprangdar, ta iba tesem nungi osang ka ajanga metetdaktsü.
“Tang yimti nungi madokteti aliba ISIS züngsemtem ajak sepaitem kabu nungi jenbutsü mechi kechisüdir süaka yimti nungi jena aotsü asoshi tang kanga merangdar,” ta osang ajangasa ashi.
“Bodhbarnü Ramadi nung sepaitem indang security checkpoint atena jena aotsü meranger, ISIS züngsem, tajemba agi parnok toku pua lir. Parnok ajakji tetsür sobutsü sobur liasü,” ta kasa osang ajangasa shisem.
US-i aniba anüng nungi amakba teloki nungita Ramadi aser temüket tesemtem nung nung joko hopta ishika Iraq sepaitemia ISIS telok den rara tesashi aika raradar.
“Onoki yimti nungi ISIS telok nungteta yokogo. Ramadi yimti ya joko sepaitemi amokbanga lir,” ta Iraq central command ajanga metetdaktsüogo.
Ramadi yimti ISIS telok nungi nüji kümogo ta asüba ya Iraq sepaitemi December 2015 nung metetdaktsü. Aji oda süaka ISIS telok tanaben nungoka aita district aika meyipa agi aser iba rara nung telok anaprong nungi nisung aika taküm laluogo.
ARA News ya independent press agency ka lir aser parnoki Rojava, Kurdistan Region, Syria, Iraq aser Turkey nung atalokba osangtem sangdonger.