NLA Deputy Speaker inyaktsü atema MLA Imtikumzuk shimogo

Dimapur, July 22 (TYO) : Mongulbarnü Nagaland Legislative Assembly nung Deputy Speaker atema election agidang BJP MLA tembo maden, saka iba nung Congress MLA Imtikumzuk den tetokteper shinga melii takok nguogo.
Deputy Speaker menden election atema Assembly Secretariat nem tenüng agütsürji Congress MLA Imtikumzuk dang liasü aser iba jagi pa den tetokteper shinga melii shimer, ta State Assembly Speaker Chotisuh Sazo-i metetdaktsü.
Taküm April 27 nü Independent MLA Levi Rengma Parliamentary Secretary ama shimba sülen pai Deputy Speaker menden toktsü.
Iba atema Speaker-i o mejembidang, BJP Legislature Party (BLP) leader, Minister P. Paiwang Konyak-i ashiba agi, “Congress Party nungi Assembly nung züngsem ka DAN sorkar nung adenba atema Party nungi agiena lir aser pa Deputy Speaker inyaktsü atema tenüng agüja lir.”
DAN sorkar nung züngsema liaka BJP-i iba candidate pusema menungittsü aser Delhi nung Party High command-ia NPF-i iba telemtetba agiba magizüker, ta Paiwang Konyak-i metetdaktsü.
Congress MLA ka Deputy Speaker inyaktsü shimba magizüker ta sayutsü atema BJP züngsemtem shingaia Imtikumzuk nem vote magütsüi kimai alu. Ajisüaka, BJP züngsem pezü medenaka NLA Speaker-i Deputy Speaker atema Imtikumzuk shimba osang metetdaktsü.
Chief Minister, T R Zeliang-i Imtikumzuk nem tenüngsang agüja jembidang, pa den tetokteper shinga melii aser ajaki mulunga shimba ajanga Assembly tarutsü tia ajungtsü sayur, ta ashi.
“Imtikumzuk ji Assembly nung züngsem tasen ka lir aser arishi küm nunga tain masü saka pa yimten mapa nungbo tanur masü, kechiyong pa lanuwa nungi political activist ka ama inyaka arur. Lanur aser tazünger yimsüsür kati kobi melii yimsüsübaren angazüktsü aser pa teinyaktsü takok ngua inyaktsü imlar,” ta T R Zeliang-isa shisem.
Tang state Assembly nung opposition bench mali aser iba asoshi nisung karibo sorkar inyakyim mita repranger mali ta arentaka bilemtsü akok. Ajisüaka, nübortem dang ni ya dang shinür, Naga yimten olemtep nung telemtetba ka agitsü atema yariteptsü tangatetba nung onok yimsüsürtem külemi longjemer inyaktsü telemtetba agi aser ibaji ajanga iba tensa ajuru, ta paisa ashi.
TR Zeliang-isa ashiba agi, Nagaland Assembly Speaker aser tang tasen shimba Deputy Speaker nati iba House akhümket meraksadaktsüi inyaka aotsü imlar.
Imtikumzuk-ia o jembidang, züngsem ajak dang amalitepa inyaktsü ayongzük aser House nung yimyatsüya tajung benshitsü aser akhümket meraksadaktsüi inyaka aotsü mepishi.
“Züngsem ajak kasa jenjang nung züngoka inyaktsü ni merangtsü,” ta paisa shisem.