2045 küm tashi nungbo robot temi mapa timbaka inyaktsü

Washington, February 14 (Agencies): Taruba küm 30 tashi nungbo artifical intelligence ajanga Robot temi meimchirtemi inyakba mapa timbaka inyaktettsü, aser ibaji ajanga alima nütsüng tesadang ka dak tema malitsü, ta mongintemi tekümdangtsü osang ka metetdaktsüogo.
US nung aliba Rice University nung computer scientist, Moshe Vardi-i, taruba küm 30 tashi nungbo gol balala aser computer ajanga meimchirtemi inyakba mapa timbaka inyaktettsü, ta ashi.
“Gol temi meimchirtemi inyakba dang tajungba inyaktettsüsa mapang ka arudagi,” ta pai ashi.
“Alima rongsenkettsüng ajanga shilem 50 dak tema mapa maguba tebilemtsü koktettsü asü (?) Mapa nungi anenertemi mapa meinyaki akumli piyong kazüba ajanga melung asütsü asü(?),” ta paisa asüngdang.
“Asenok matsüngdang aliba tasüngdangba atema asen loktii telangzüba agütsütsü nüngdaker ta ni bilemer: Gol tem ajanga meimchirtemi inyakba mapa ajak inyakra ali meimchirtem kechi inyaktsü (?),” ta paisa ashi.
“Ni asüngdangnübaji, ‘Asenoki yanglutetba technology ajanga meimchir nem tajangzük agütsür asü (?)” ta US National Academy of Engineering aser National Academy of Science naprong nung züngsem Vardi-i ashi.
Alima rongsenkettsüng inyakyim ajanga meimchir billion aika mapa meinyaki kazütsüsa inyaktetaka ibaji ajanga meimchirtem ajangzüktsü asü, ta pai shiogo.
“Iba tarutsü tia ya majung ama nibo bilemer, kechiyong kecha meinyaki kazüba takuim kaji jangramatem ama ni bilemer. Ali meimchir atema mapa inyaktsüji nüngdak ama ni bilemer,” ta pai ashi.