Kanye West-i Mark Zuckerberg dang sen teyari asüngdang

February 15, 2016 : Rap kentener Kanye West ya sen dollar billion 53 sentsüh lir, ta jembir. Arishi küm 38 tain, Kenye West-i pa sentsüh tebilemtsü twitter ajanga lemsatepogo, ta femalefirst.co.uk. ajanga metetdaktsü.

“Asenokbo lenmang nung tsüngsangtepdi. Ni alima yaritsü asoshi kanga aroka ia bilemer. Ni sen dollar million 53 tashi sentsüh liaka ni nenok dang ya ashir. Takok angutsü asoshi sarasademjang. Ni ya kü mulung ajak agi lemsateper,” ta micro-blogging website, twitter ajanga honibar aonung lemsatep.

Kanye West-i pa sentsüh aliba lemsatepba sülen Facebook ngutetsang Mark Zuckerberg dang sen teyari asoshi asüngdangogo.

Pai, “Ni sen nung yarir kar melira mapa tajung inyaktsü bilemba nung tamakok alutsü,” ta Hombarnep (February 15, 2016) twitter ajanga lemsatep.

“Mark Zuckerberg tanü ya na tasoba anogo-a ta ni meteta lir ajisüaka nai kü dang asüng call süang ta meshidaktsüner,” Nai Hip Hop meimer, nai kü mapa meimer…..ni ya nai kanga sapuba kentener ka lir aser nai kü kentem nür kidang atemer…Alima ajaki imlibilema tweet, FaceTime, Facebook aser instagram ajanga Mark-i ni yaritsü atema nungitang. Ni ya tanü putu nisung ka lir, ni alima nung mapa tajung inyakner….kü ket nung sen peria mali…Mark, ni yimjak ma nung nü teyari asüngdanger…nai ni nüngdakba mapang yariba ni kodanga mamai na akhümtsübutsü aser alimai ibaji atema na meimtsü. Ni alima ya tesem tajungba ka küma melenshiner,” ta Kanye West-i ashi.

Iba sülen pai Google Inc. co-founder Larry Page dang, business inyakertemi Africa nung timtema alirtem kija atema mebilemi pei linuk nung timtemer aser nüngdakba purtem atema bilemtsüla ta ashi.

“Hey Larry Page, ni nü teyari nüngdaker. Nenok San Francisco nung alir ajaki rap ken atemer ajisüaka item ken atenertembo meyarir. Nenok ajaki ni yaritsü atema kü den senden menogo ajisüaka shingaia meyarir,” ta Kanye-i ashi.

Pa sentsüh aliba osang metetdaktsü nü pa indang kensep The Life of Pablo saya liasü.

Küm noklang ka sülenbo asenok iba lima nung ya malitsü anungji akümlidang meyaritep nung kodang anga yariteptsü, ta pai ashi.