Jordan lepertem nung auyaba Drones ajanga nguteta

New York, February 15 (Agencies): Drones tem ya raraba mapang chiyungtsü bentsür aruba aser tsükchir den raraba nung yariba dang masü saka Dead Sea Plain, Jordan nung itdangiter mapa nunga amshidar.

Feifa tesem nung ano maneni auyadar ta bushiteta lir. Iba tesem ya Bab edh-Dhra nung kilometre 38 pilar lir, ta DePaul University Chicago nung archaeologist kati ashi.

Iba tesem nung ‘Iron Age’ mapang indang yimtsüng tejen ka lir aser yangji leper tejen tulu ka lir. Küm ishika tejakdang iba tesem nung auyaba kanga bulua liasü aser iba mapang leper tejen meyirjang aika sama.

“Archaeologists tem asoshi drones tem ya teyarir tulutiba ka mesüka kümogo. Kechiba süra drone ajanga tesem indang ali tusaba aser leper nung rema aliba ajak indang osang tejangja bendentetter. Item drones tem ya tesem asadanga reprangba aser auashi atalokba reprangtsü atema amshitsü kanga junger,” ta DePaul nung assistant professor of anthropology, Morag M Kersel-i metetdaktsü.

“2013 aser 2014 tsüngda nung auyaba 34 tashi puteta liasü…anungji iba ya ajanga nisungtem ano maneni auyadar ta meteter. 2015 kümbo iba amala osang tejangja kecha mongutet. Iba tesem nung auyaba tera ajema akümba atema bushisüngdang kar agidar,” ta Morag M Kersel-i ashi.

Kersel-i, drones tem ajanga teyari agütsüba indang taoba hopta Washington, DC nung ‘American Association for the Advancement of Science’ senden akadang rasaa shiogo.