Obendangertemi JNU kaketshirtem dak azük

New Delhi, February 15 (Agencies): Jawarharlal Nehru Universiry (JNU) kaketshir Union Tir, Kanhaiya Kumar anema ken o angadangtsü aliba court, Patiala House court kima Hombar nü obendangertem telok kati osangbenertem densema JNU kaketshirtem parnok nisung trok dak azük.

Ken o anga metenzükdang obendangertem kar court takdangi ia osangbenertem densema JNU kaketshirtem kimai nungzüka yok, aser parnok dang court telongtet toktsür osang ta ashi.

Osangbenertem den jembidang AISF Tir, Waliullah Qadri-i, “Nenok University (JNU) nungi linük anemertem aser kiralongrartem adoker, nenoki linük toktsür aotsüla. India tatem makai liang aser JNU shibangjang, ta asadena parnoki kaketshirtem aser tesayurtem court nungi arizüka kimai yok. Ajungbena onok dak azük. Kaketshir tetsürtem densema parnoki onok nungoktsü aser azük,” ta ashi.

Kaketshirtem aser tesayurtem jagia, iba ya ‘open court hearing’ ka lir anungji court toktsür maotsü ta ashi.

Ano telok kati osangbenertem indang identity cards reprangba sülen court toktsür aotsü tuyu, ajisüaka osangbenertemi ibaji ashishia court toktsür maoba ajanga parnok dak-a azük. Iba mapang nung print aser electronic media osangbener ana yiruogo.

Tesülen police-i kaketshirtem, tesayurtem aser osangbenertem ajak court nungi arizüka yoka liasü.