Rahul Gandhi-i kiralongrartem pusemer: Amit Shah

New Delhi, Feb. 15 (Agencies): Tawa Congress tatong Tir, Rahul Gandhi-i Jawaharlal Nehru University (JNU) semdangba aser University kaketshirtem pusemba atema tanü Hombar nü Bharatiya Janata Party (BJP) Tir, Amit Shah-i Rahul-i kiralongrartem pusemer, ta aitsüogo.

Shah-i Congress Tir Sonia Gandhi aser lar jabaso Rahul na dang tasüngdangba aika asüngdangba den külemi JNU ken o nung Rahul-i tatok meshitsüla, ta khangogo.

Amit-i, Left party tem tangatetba nüngtem nung linük anemba maparen pusembaji magizüktettsü, ta ashi.

BJP Tir Amit-i jembiba otemji ajanga BJP-i iba ken o nung Congress aser tanga opposition party tem sashia aitsütsü südi ta temaitsü sayur.

Social media ajanga Amit-i, “Linük yimtiba nung alina tongtibang University ka nung kiralongraba aser Seperatist ajungshiba ajanga iba University tenüng menüktsütsü merangogo. Ni Rahul Gandhi dang ya asüngdangner, Centre sorkari ola madokra iba ya linük tebilemtsü ka asütsü asü (?) Item linük anemertem pusemba ajanga nai (Rahul) linük ashioktsürtem ajungmsor masü no (?),” ta asüngdang.

“Sademsadema jembitsü temeten nüngtem nung Seperatist tem kümzükba ajanga pai ano India nung telemsa adokdaktsüner asü (?) JNU nung Congres tatong Tir aser par party lenirtemi jembiba otem ajanga, parnok melungjang nung linük atema bilema maliba kuli maneni sayur,” ta Shah-i ashi.

BJP tongti Shah-isa, Modi’er sorkar takok anguba ajanga Congress kodamasür aser jashir aser par party lenirtemi opposition khuret abentsü shilem koma agitsü’ar telemtetba magiteter, ta aitsü.

Pai ashiba agi, Modi’er sorkari Kashmir nunga linük anemba maparen azüoktetogo, opposition tongti party süaka Congress-i JNU nung maaksütsü maparen pusemer.

“Linük senso crore 125 tenüng nung ni asüngdangbatem atema Congress tongti, Sonia Gandhi aser tatong Tir Rahul Gandhi na dang nungi ni telangzüba aginer, iba den külemi Rahul Gandhi-i linük dang tatok meshitsü ni akhanger,” ta Shah-isa ashi.