Kecha mapa makatsü !

Küm 30 sülenbo alima nung nisungi inyaktsüsa, inyaknüyonga, mapa kecha makatsü, kechiyong mapa ajak machine agi dang inyaktsü ta US scientist kati metetdaktsüogo.Tetezü, küm 30 sülenbo asenok shinga mapa meinyaki chiyongli kazüli, chiyongli kazüli ta asütsü ! Iba osang ya asenok asoshi tepelatsü osang ka asü ? Aji oda, mapa kecha maka chiyongli kazüli ta asütsüba takümji jangratemtsüka asütsü asü ? Item tasüngdangbatem ya asenok ajak asoshi bilemdangtsü onük kanga tongtibang kümogo. Nisungi inyaktsüba mapa ajak machine agi mesüra Smart Robot agi inyaktsü, anungji nisungtembo anisüngzüka dang alitsü. Iba mapangji asenok nükla dangi arua bilemdangdang jangratema bilemer, kechiyong mapa meinyaki chiyonga dang linübaji meimchir yimya dak keta lir. Ajisüaka, mapa ajak machine nem inyakdaktsür nisungtem mapa maka kazütsübaji alima nung nisungtem asoshi shisabolutsüka asütsü ta US scientist-temi bilemer. Nisung ka taküm nung mapa maka anisüngzüka dang alitsübaji jangratemtsüka masütsü kechiyong nisungtem jangratema alitsü asoshi nisungtem asoshi mapa inyaktsüba ya kanga tongtibang shilem ka lir ta US scientist-i  alima meimchir nem tayongzükba ka agüja lir. Atangji, asenok aikati mapa meinyakner, iba jagi asenok jangratema malir, kechiyong alima nung nisungtem asoshi mapa inyaktsüba yabo Tsüngremi latettsüba ozüng lir. Ibaji mangateti asenok aikati mapa meinyaki anisüngzüka alitsü meranger. Iba jagi tanü asenok tejakleni mouteti kangshir. Asenokbo kaketshisatsü bushiba ya mapa inyaktsü bushir masü saka mapa meinyaki angati ita sen chia kazütsü asoshi bushir amai bilemer. Iba tangatetba jagi tsüraburtema mapai maor aser tanurtema kecha meinyaker ta amajok nung taküm arishi temdoka kazütepba taküm aser kibong aika kümogo. Iba amaji asenokbo kazüa lia 2045 küm tashi nungbo asenoki inyaknüyonga mapa ajak machine-i dang inyaktsütsüsa mapang ka agi asenok menepa arutsü. Tanüa mapa aika machine agi dang inyaker, iba jagi nisungtem kanga ayonga kümogo. Akhidang tsürabur mapangbo alui anepdang yakta tekolak nung khu bener ao aser anogo piyong teka anakdena alu nung inyaka monger nikongdang kidangi adoka mi aputeta soruchiok chiyonger külenang khen anisüngzük. Tanübo, asenok alu aoyonga gari nung aor, alua machine nem dang inyakdaktsür aser gari nem dang khu bendaktsür. Akhidang, tsük aser süngotsü ajak alu nungi tekolak nung bentet aser kidanga tzüboi tzü atai orr külenang süng tsüka soruchiok. Tanübo item mapatemji maka kümogo. Tzü pipe nung arur asünungji tzüdai maor, soruchioka gas stove nung soruchioker, sü machine nung ashir. Aji oda, television reprangtsü asoshia tv tonga orr atemloktsü aser channel melentsü nüngdak madoker, kechiyong item ajakji mena yur remote control agi inyaker. Joko, lesson mebushiyonga aser kaketreju nungi anguba tazüngba jenjang tajung maliyonga temetetnüba ajak internet ajanga computer nung angur, anungji akhidang ama amui moi lesson ajak mulungzüng agi akoktsü nüngdak madoker. Joko, saisapong jangrartema moapu nung tetsüng teben arakzüka asayar masü saka takdang nung mena yur computer nung anogo piyong asayaa amonger. Akhi ama teka ajak apuzüka tsük asenba mali, tekolak netyoka ia khu mabener aser tetsüng agi jajatsü nüngdak madoker, anungji temang nungi asentzü sendoktsü lenmang mali saka chiyongtsübo tajungba chiyonger. Aji oda, alima nung nisungtem inyaktsüba mapa anogo shia tajemba tajemba kümdagi. Ibaji alima meimchirtem asoshi shisabolutsüka lir ta US scientist-i ashir. Iba osang jagi asenok aoksatsüla aser machine liang teli, computer liang teli asenok temang arakzüka mapa inyaktsü aser asentzü sendoktsübaji kanga tongtibanga ta rajemdi. Mapa ajak machine nem inyakdaktsür asenok kazüa dang alitsübaji jangratemtsüka asütsü ta asenoki bilemra, aji tai asütsü. Nisungbo mapa inyaktsüla anungji mapa meinyakra nisung masütsü. Iba amaji asütsüsa Tsüngremi nisung yangluja lir.