NE nem maongka balaka agüja aliba Modi-i agien: Rahul

Guwahati, Feb. 15 (Agencies): Assam assembly election agitsü mapang ana nung lia Hombarnü Congress tatong Tir, Rahul Gandhi-i, BJP-i tamangba lokti tsüngda tensa raksadaktsütsü meranger, aser Northeast state tem nem maongka balaka agüja aliba Ato kilonseri agienogo, ta aitsü.
Taruba Assam assembly election atema Congress nüboyim sentong tenzüka tanü Assam, Lakhimpur district kübok Bihpuria nung Congress nung inyaker tetsürtem senden nung jembidang Rahul Gandh-i, “Yaküm Bihar assembly election agitsü lia BJP-i Hindu aser Muslim lokti tsüngda telemsa adokdaktsütsü meranga liasü, ajisüaka secular teloktep (JD-U, RJD & Congress)-i BJP sentongji raksatsü,” ta ashi.
“Assam nung tanaben yimjung alitsüsa asen Chief minister Tarun Gogoi-i kanga meranga inyakogo. Ajisüaka BJP-i tensa raksatsütsü meranger. Tamangba lokti tsüngda rara adokdaktsütsü atema BJP-i inyakbaji asenoki Bihar, Harayana, Uttar Pradesh aser tanga state tem nung nguogo,” ta Rahul-i aitsü.
AICC tatong Tir, Rahul-i Ato kilonser-a aija, 2014 Lok Sabha election mapang Assam aser linük dang nangzükbatem nung Narendra Modi-i tamakok nguogo, ta ashi.
“Modi-i lanurtem nem mapa agütsütsü nangzük, osettsüset nung jenjang atuba azüoktsü aser black money meyipa bener arutsü nangzük. Modi-i mapa agütsür asü (?) Menjang seret ka nung sen 200 tashi kümogo, ano külen bendanglen nungi black money meyipa bener aruba sülen pai bank account shia nung sen lakh 15 enoktsütsü nangzükba tu matalok. Ato kilonser akümba sülen Modi-i mezüng inyakbaji, Assam aser Northeast state tem nem maongka balaka agüja aliba (special category status) agien,” ta Rahul-i aitsü.