NBCYD-i 7 buba Silver Cup T-20 Cricket Tourney ayonger

Kohima, February 16 (TYO): Taruba March ita 15 nü nungi tenzüka 7 buba Silver Cup Twenty-20 (T-20) Cricket Tournament Kohima kübok Jakhama Local Ground nung asayatsü asoshi Nepali Baptist Church Youth Department (NBCYD)-i ayongogo.
‘Peace & Unity through Cricket’ omen nung ajemdaker ayongba asayamong nung champions aser tanabuba jenjang angur telok ana nem takok marok o kulikaket den senpet sena sen 70,000 aser sen 25,000 agütsütsü renemba osang ka Secretary, Organising Committee, Robi Thapa-i tanü sangdong ka ajanga metetdaktsüogo.
Semifinal asaya nung tamakok angur telok anaprongla nem senpet sen 5000 agütsütsü renemba den külemi, highest scorer, highest wicket taker aser best wicket keeper densema, individual shilem nunga tangar den tajungba asayar shia nem senpet sen 1500 agütsütsü renemba osang ka pai metetdaktsü.
Paisa ashiba agi, “Tan asayamong nung best disciplined team jenjang anguba telok nema senpet sen 2000 agütsütsü renemogo”.
Iba asayamong nung shilem agitsü jangrar telok shia nungi shilem agitsü taa sen 5000 agitsü saka arogo mesüra college tenüng nung shilem agir telok nungibo taa sen 4000 dang agitsü renema lir.
Tan asayamong den sentakba osangtsüsang tali jangjashitsü jangrartemi phone no. 9774039646, 8974984619, 9615941696, 9774294729 & 9774416162 ajanga tayonger luden den tongteprateptettsü.

You must be logged in to post a comment Login