SC-i Arunachal Angh tashi sota ayutsü memulunger

New Delhi, February 16 (Agencies) : President’s rule kübok aliba Arunachal Pradesh nung Angh, JP Rakhowa nem sorkar tasen ka tenangzükba agitsü temelaba magütsütsüla ta Congress lennirtemi Supreme Court dang mepishi saka magizük.
Congress lennirtemisa mepetmesü adoka aliba state nung yimten mapa kecha meinyaki atatsü aser sorkar tasen ka tentettsü temelaba magütsüi atatsüla ta mepishi saka Justice JS Khehar-i aniba constitution bench-i item temepishiba magizük.
“Onoki nenok o toktepba angadangogo. Onoki tetuyuba kecha magütsütsü aser iba dak sendakba onük ya kulitem nung ajemdaker angatsü” ta JS Khehar, Dipak Misra, MB Lokur, PC Ghose aser NV Ramana nungertem adenba bench-isa ashi.
Congress lennirtemi Arunachal state nung yimten mapa meinyaki atatsü asüngdanger ta osang angazükba sülen Attorney General Mukul Rohatgi okadaki aru aser pai, “okadaki Linük Temzüng ajanga shimba tashi kati telemtetba agiba sota meyutettsü” ta ashi.
“Linük Temzüng amer ka indang tashiji okadak kati azüoktsü makok. Tanü mesüra asüngbo President’s Rule ji agientsüla aser sorkar ka tentettsüla” ta Attorney General Rohatgi-i Congress lennirtemi benokba ken o anema jembi.
Parliament-i President’s Rule atema oshidang kecha magütsü lir aser okadaki oshidang kechi koma ka agütsüdir agüjaka, floor test ajanga dang telangzüba angutsü, ta Rohatgi-isa metetdaktsü.
Supreme Court bench-i Arunachal Pradesh Congress lennirtem atema noktakertem senior lawyers Fali S Nariman aser Kapil Sibal na dang parnoki mepishiba magizüker ta metetdaktsü.
Tanü ken o angadangba mapang Sibal-i Angh tenüng nung züluba sangdong ka nung ammeter, “kodaser Angh kati House nungi anenja aliba Congress lennir ka Chief Minister inyaktsü atema tenangzükba agidaktsütsü” ta asüngdanga liasü.
Supreme Court-i ken o tem asoshi telemtetba magi tashi sorkar tasen ka meshimi atatsü atema tetuyuba agüjang ta Sibal-isa Supreme Court dang ashi.