Grammy award mapang Taylor Swift-i Kanye West aitsü

Los Angeles, February 16 (Agencies): 58 buba Grammy Awards sentong nung Taylor Swift-i ‘Album of the Year’ award agizükdang Kanye West indang mangatettep adoka aliba ken “Famous” aitsüogo.

Swift-i Kanye tenüngbo metetshi, ajisüaka lai aiürtem dang, “Grammy award nung anaben tashi album of the year award agizüker mezüngbuba tetsür ka ama ni tanutsür ajak dang ya shiner: Nü lenmang nung nai takok anguba yirutsütsü aser nai takok anguba tenüng agitsü merangtsüpur nisungtem alitsü. Ajisüaka nai nü mapa nungdang temelung agütsüra aser parnok nem tang lenmangleni atsüer moudaktsüra, kenü anogobo nü alizüng atongdang nai meyipa reprangdangtsü, aser ibaji nü den aser na meimertem ajanga iba jenjangji tongtet ta meteta alima nung tepelatibaji ibaji asütsü,” ta ashi.

Arishi küm 38 Kanye West aser Swift na tejen otsü ka lir. 2009 küm MTV VMAs nung Swift-i Best Female Video award anguba sülen o jembidang rap kentener Kanye-i sangbangi atua la dang nungi microphone rakzüker, iba award ji Beyonce angutsü temsüa lir, ta la maksüja liasü.

Iba sülen West-i pa indang “Famous” ken nung Swift nüngtugu akumbaji pa ajanga lir ta ashiba sülen iba ken nung tashishitep adoka liasü.

West-i Swift den shi nung medemogo ta ken nungji atenba dang masü saka pa ajanga la nüngtugu aküm ta ashiba oji Taylor medemtsür aser kentener Selena Gomez-i aitsüogo. Gomez dak alia model Gigi Hadid, actress Jamie King aser Ruby Rose nungeria Swift pusema jembiogo.