Tamil Nadu nung AIIMS Project kara tenzüktsü Jaya-i mepishi

Chennai, February 17 (Agencies): Tanü Bodhbarnü Tamil Nadu Chief Minister, J Jayalalithaa-i Ato kilonser, Narendra Modi dang, state nung All India Institute of Medical Sciences (AIIMS) Hospital maparen tekaratiba nung tenzüktsü atema mera agidaktsüner, ta mepishiogo.

Lai shidi ka ajanga Modi dang Centre nungi teshimtet telok kati yaküm April ita nung Tamil Nadu semdanga state nung AIIMS Hospital yanglutsü atema tesem pongu reprangdangogo, ta ashi.

“Ajisüaka, Tamil Nadu koba tesem nung AIIMS yanglutsü lemtet’ar ibaji tang tashi (state sorkar nem) memetetdaktsü,” ta lai shidi nung Modi dang shia lir.

“Ni nü dang Tamil Nadu koba tesem nung AIIMS yanglutsü lemtet’ar tekaraba nung sangdongtsü mepishir,” ta lai ashi.

Jayalalithaa-isa, Union Budget 2014-15 sangdongba mapang linük tesem balala nung All India Institute of Medical Sciences tasentem yanglutsü sangdong, aser Tamil Nadu nunga ka yanglutsü ni mepishi, ta ashi.

“Union Budget 2015-16 nungi telangzüba agütsüdang Tamil Nadu nunga AIIMS ka yanglutsü sangdong,” ta lai ashi.

State nung AIIMS yanglutsü tesem shimtsü atema yaküm Centre nungi teshimtet telok kati Thanjavur, Kancheepuram, Pudukottai, Erode aser Madurai district tem sema liasü.