Ashton Carter-i Iraq lenirtem den ajurutepogo

U.S. Defense Secretary, Ashton Carter (Tiyongtsü)-i Baghdad International Airport tonga tanü Brehostibar nü aoba sülen U.S.’er Iraq Ambassador, Stu Jones (Abelen) aser US mitkar lenir, Lt. Gen. James Terry (Achijilen) na den külemi Baghdad yimti bushia ayamesoba noksa nung angur. (Baghdad, July 23)

Baghdad, July 23 (Agencies): US Defense Secretary, Ashton Carter-i mapang jilia osang memetetdaktsüi tanü Brehostibar nü Iraq semdangogo.

Carter-i tanü Baghdad tonga aoba sülen, Iran Ato Kilonser, Haider al-Abadi aser Defense Minister, Khaled al-Obeidi na den ajurutepa senden amenba osang jangjaogo.

Tang Iraq anüdoklentip aser anülulentip tsütsü densemba lushi tashiyim agi agia aliba kiralongrar telok, Islamic State (IS) anema tongpang rarabaren nung yaritepdaktsütsü asoshi US-i Sunni kin nungi sepaitem anioksemtsü sentong renema lir.

Aji oda, Carter-i Iraq lenirtem den ajurutepba den külemi, Sunni kin lenirtem dena tanü ajurutepa liasü.

Iraq’er Anbar province kübok Ramadi yimti IS ket nungi tanaben agishitü asoshi Iraq-i par mitkartem nem terenemshiba tulu agütsütsü tenzüka lir.

“Iraq-i IS telok anema rarabaren nung ozü US-i ozü miktar tayimtsü aser IS telok den sentakba miim osangtem lemsatepa Iraq mitkar den maneni yariteptsü renema lir,” ta Carter-i metetdaktsü.

US Tir, Barack Obama-i par mitkartem IS tesep tonga yoka kiralongrartem den tongpang raradaktsütsü memulungi lir saka pai par miktar züngsem 3,000 dak tema Iraq-i yoka Iraq mitkartem nem kiralongrartem den tongpang raratsü terenemshiba tulu agütsütsü tenzükogo.

Ano, US-i aniba teloktep alima mitkartemi par tayimtsü amshia IS teloki tentetba teseptem mapang shia amakba osang bushiteta lir.

Par telok samatsütsü merang aka, IS teloki Baghdad aser Diyala province na nung bomb lendong ishika atalokdakja yashi, Bodbar nüa nisung 30 shi pokseta südaktsüba osang bushitetogo.