Doyang nung Angling Festival 2016 alitsü

Dimapur, February 17 (TYO): Anglers Association Nagaland (AAN)-i tan mezüngbuba atema Tzuzha Angling Festival 2016 alitsü ayongzüker aser ibaji Doyang, Wokha nung on March 11 & 12, 2016 nung alitsü.

Iba sentong ya Fisheries, Printing & Stationary Parliamentary secretary, Shetoyi Sumi-i lapoktsütsü aser tetushi tejaokerji Wokha Deputy Commissioner, A Robin Lotha alitsü.

Nagaland nung ango wazüka ayutsü indang osang prokshitsü aser ango apuba (angling) saisapong ajungkettsü nükjidong nung iba benjung ayongzüker, ta AAN Tir, Isacc Zhimomi-i osangbener senden ka nung ashi.

Tanü asenoki mozü, electricity aser tapoktsütem amshia ango apuba ajanga ayong aser awatsüng aika raksatsür. Angopuba noktangtsü atema masü saka angopuba yimya tamajung mamshitsü osang sangdongtsü atema iba benjung amungtsü, ta paisa ashi.

Iba benjung nung north east aser India kübok tanga tesemtem nungi angopurtemi shilem agitsü aser nisung mashi kati iba benjung nung sen tera agüja tenüng züluokba sülen shilem agitsü akok, ta AAN Tir-isa metetdaktsü.

AAN ya 2013 küm züngsem 40 shi kati tenzük saka tangbo parnok züngsem 200 den teimba kümogo. Tarutsü anogotem nunga parnoki ibala mesükba sentong ayongzüka amungtsü tebilemba lir.

Nowgoan, Assam nung North East Angling Competition alidang AAN-i sempet 5 nungi 4 tashi nung takok ngua liasü.