LG-i ‘Delhi sorkarji ni lir’ ta jembiba Kejriwal-i aitsür

New Delhi, July 23 (Agencies): Brihostibar nü AAP tongti lenir aser Delhi chief minister Arvind Kejriwal-i Delhi lieutenant governor Najeeb Jung-i “Delhi sorkarji ni lir” ta jembiba o aitsüogo.

“Kodaser nisung kati paji sorkar ka ta shiteter (?) Iba ya ajanga Delhi nung nisung ka kijai tashi amshiba inyakyimleni anitsü,” ta Kejriwal-i shidi ka ajanga LG dang ashi.

“India ya democray linük ka lir aser Delhi ya nüburtemi shimtetba sorkar lir. Delhi sorkar ya nisung ka mesütettsü,” ta Delhi Chief minister-i ashi.

Tamalen Home ministry tetuyuba nung ajemdaker Lieutenant Governor office ajanga, “‘Sorkar’ tetezü, National Capital Territory of Delhi nung Linük temzüng Arrla 239AA ajanga tashi agütsüba aser Arrla 239 kübok Tir-i shimba Lieutenant Governor lir,” ta jembia liasü.

LG office nungi chief minister office dangi shidi ka ajanga, Delhi Commission for Women (DCW) tongti Swati Maliwal shimba magizükba dak sentakba nung Delhi CM-i iba o jembiogo.

Maliwal ya AAP lenir Navin Jaihind kinüngtsü lir.

La ya Delhi CM-i DCW tongti shim saka tanü Lieutenant Governor-i ibaji magizük.

Osang ajanga angashiba agi, tanü la office kari shibangtsür liasü aser tesülenbo lapoka liasü saka la tenüng zülua aliba (name plate) agiener liasü.

Maliwal shimba ajanga Delhi nung maneni LG Najeeb Jung aser AAP sorkar na tsüngda mangatettep tasen ka adokogo.

LG office-i ashiba agi, temzüng nung Delhi sorkari shimbaji LG nem tama agizükdaktsütsüla, ajisüaka Delhi sorkari yamaji meinyakba ajanga la shimbaji LG-i magizük.