Arunachal nung sorkar akumtsü SC-i melaogo

New Delhi, Feb. 18 (Agencies): Küm aika Congress Party-i Arunachal Pradesh yimsüsüa aruba sülen asüng, Hokolbarnü state nung sorkar tasen ka arutsüa akok.
Tanü Supreme Court (SC)-i, North East nung aliba state (Arunachal Pradesh) nung sorkar tasen akumtsü akok, ta metetdaktsüogo.
Tang Arunachal ya President’s Rule kübok lir.
Brihostibarnü SC-i Arunachal nung PR agientsü atema lenmang lapoktsüogo aser ibaji ajanga arrtsülen aliba state nung sorkar tasen akumtsü melar.
Sorkar tasenba office atema tenangzükba sentongji asüng, Hokolbar anepdang 9:30 nung agitsü akok, aser Tir Pranab-ia ibaji agizüktsü imlar, ta osang ka ajanga NDTV dang ashi.
Arunachal Pradesh assembly nung Congress züngsem 47 liasü ajisüaka party telung nung telemsa adokba sülen Congress MLA 20-i state nung opposition party tongti, BJP aser Independent MLA ana den loktep.
Iba dak sentakba nung Congress-i, Arunachal nung Nabam Tuki’er sorkar anokshitstsü atema BJP-i Centre tashi amshi, ta tai tongloktsüogo.
February 15, 2016 nü Congress nungi melungmesüi aliba MLA, Kalikho Pul-i state Angh, Jyoti Prasad Rajkhowa ajurua mepetmesü adoka aliba state nung sorkar tasen akumtsü pusemba shidi ka agüja liasü.
Shidi nungji Pul-i Angh dang, state sorkar akumtsü atema Congress MLA 18, BJP MLA 11 aser Independent MLA anati nungiter, ta shia liasü.