Nagaland nung DBs shimdang temsüa alir shimtsüla

Kohima, Feb.18 (TYO) : Nagaland nung Dobashitem aika Dobashi asütsü metemsüba purtem lir, kechiyong parnokji chiaajemba nung mazüok, jakla yimya majung, küm agi memeshi aser kecha temulung alemtsüsa masüba purtem lir, anungji teshimdangyongi jungjunga repranger temsüa alirtem dang shimtsüsa inyakyim ka alitsüla ta Mon nung Deputy Commissioner, Wb.W. Honje Konyak, NCS-i metetdaktsüogo.
Pai iba o ya yashi Mon nung Nagaland Dobashis’ Association mongdang aliba sentong nung Dobashitem ajungshia jembidang metetdaktsü.
Dobashitem yagi parnok alidak tensa mapang junga alitsüsa inyaker, anungji parnokji district administration atema tenük aser tenarong lir ta Honje-isa metetdaktsü. Iba ama nübortem tipdema lidaktsütsü atema inyaktsü khuret alinungji, Dobashitem dak tangari temulung lemtettsüsa alitsüla aser nüngdak ajak meteta alitsüla aser ano ken o bushisüngdangba maparen junga inyaktetba nisung asütsüla ta Mon DC-isa metetdaktsü.
” DBs court ya customary court-bo masü saka Deputy Commissioner atema subordinate court lir. Ajisüaka, customary court maliba agi DBs court nung obendang agütsübaji high court aser Supreme Court nunga agizüker ta paisa ashi.
DBs okadak ken o angadanga bendangba inyakyim ajak shitak alitsüla aser item nungji ken o agizükba, ken o benokertem, kechi ken o, ken o angadangba anogo aser obendang agütsüba anogo ajak shitak züluoka alitsüla aser ochi obendang agütsütettsüsa ken o jungjunga angadangtsüla aser kuli shitak bendentsüla ta Mon DC-isa metetdaktsü.
Tangbo Dobashitem rongnung aika Dobashi inyaktsü metemsüba purtem lir, anungji Dobashi shimtsü asosi tetendangba inyakyim shitak alitsüla aser pei nisung aser kinunger apia yimten nung alirtemi meshimtsüka saka nisung tetemsü yimtsüng aser tzükong shia nungi shimtsüla ta Honje-isa tebilemba ka metetdaktsü. Paisa DB-tem dang parnok sorkar mapa nung alinungji DBs service rules yanglutsü asoshi sorkar dang ashitsüla ta metetdaktsü.
Iba kasa sentong nung PA to DC Wokha, Y.M. Odyuo-ia DB-tem ajak dang pei mapa aser khuret meteta inyaktsü asoshi mepishia metetdaktsü.
Iba sentong nung Tseminyu DB-temi sobaliba ken ka aten aser NDBA tongti zülur, Alongba menden liasü. Iba mongdang nung NDBA tongti ketdangpurtem nem ano term ka inyaktsü asoshi nungloktsü.