Yimchunger-temi state sorkar nem takangba onüktem agütsü

Dimapur, Feb 18 (TYO) : Tan ita February 6, 2016 aonung Shamator aser Kiphire na tsüngda mejangjatetba nisungtemi apuani khasetba maparen dak sendakba nung state sorkari parnoki akangba mapatem kecha mataloktsüba anema tejashi sayua tanü Brehostibar nü yangi Dimapur nung Western Yimchunger Hoho-i yimdong süa ola madoki jajaba sentong ka ayongzüka agiogo. Iba sentong ya Yimchunger Tribal Council ajanga tashi agütsür ayongzükba liasü.
Tanü iba sentong nung Western Yimchunger Hoho purtem DC court lenjem nung adenshir yang nung jagi tetsüng agi DC office tashi orr DC nem Chief Secretary dangi züluba shidi ka agütsü. Iba sülen Showba village ground nung lokti senden ka liasü.
Tanü Yimchungertemi Chief Secretary nem agütsüba shidi nungji February 6 nü atalokba lendong sülen Kiphire nung alir Yimchungertem shinroksa pei kidang melitettsüsa kümer tesem balala nung jenoka ali, parnok nemji yaktasa nüngdakba teyari agütsütsüla aser ano talisa kaketshirtem parnok school aser college shitak züngtettsüsa nüngdakba maparen ajak nung teyari agütsütsüla ta takangba ka agüja lir.
Ano, parnokisa Kiphire town aser temeket nung sorkar mapa nung alir Yimchunger ajak timtem lendong malidak tesemi transfer yoktsüla ta akangba ka metetdaktsü.
Shamator nung February 9 nü tai maketba kaketshir aser nübortem dak injang khalokja yirutsür IRB police tanishirtem aser constable Thrile Sangtam mapa nungi anentsütsüla aser yirur alirtem yaritsüla ta takangba agüja lir.
Kiphire town nung February 7 nungi 10 tashi nung kiojen, osettsüset aser gari raksatsüba takoksaji USLP aser state sorkar nati menoktsüla ta parnokisa metetdaktsü.
Item lendong timtem atalokba bushisüngdangtsü asoshi shimba Inquiry Commission-i Kiphire nung inyaker sorkar tenzükertem mapa jungjunga bushitsüla aser parnok mapa yari temerenshi agütsütsüla ta Yimchungertemisa metetdaktsüogo.
Kiphire district akümba indang yakta sangdongtsüla aser cabinet-i lemteba ama kechisa tangatettep ken o renema ali, itemji shitak mapa küma inyaktsüla ta Yimchungertemisa metetdaktsü.
Item takangbatem ya mataloktsüra, ano maneni yimya balaka nung longkak aitba sentong ayongzüka akatsü ta parnokisa metetdaktsü.
February 6 aonung lendong atalokba sülen tanen maka tesem balala nung lendong atalokba ajanga Pungro nung yimchunger kibong 1300 dak tali jenoka lir ta angazüker. Item rongnungji kaketshir 800 shi lir aser parnok rongnungji kaketshir 200 shi tatidang balala agütsüdagi aser ano aika school nung admission magii lir.