RSS-i parnok tangatetba benoktsü meranger: Rahul Gandhi

New Delhi, February 18 (Agencies): Jawaharlal Nehru University (JNU) ken o dak sentakba onük nung tanü Brihostibarnü Congress Party tatong Tir, Rahul Gandhi-i Tir, Pranab Mukherjee ajurua liasü aser pai Rashtriya Swayamsevak Sangh (RSS) aija, linük tesem ajungalen RSS-i kaketshirtem matsüngdang ‘tangatetba tasü’ benoktsü meranger, ta ashi.
Brihostibarnü linük Tir, Pranab Mukherjee ajuruba sülen osangbeneretm den jembidang Congress lenir Rahul-i, Narendra Modi’er sorkar aser RSS-i kaketshirtem ola adoktsü temeten magütsür, ta ashi.
RSS indang tangatetba aija Rahul-i, “Kaketshirtem matsüngdang parnok ‘tangatetba tasü’ benokbaji ozüng alema inyakba tulutiba, aser ibaji ajanga iba linük ya azükaru masütsü,” ta ashi.
Ano Hyderabad University nung Dalit nunger kaketshir Rohith Vemula soseta asüba keno-a süoka Amethi MP, Rahul Gandhi-i, PhD kaketshir (Rohit)-i sorkar anema ola adoktsü merangba ajanga pa ola songtema ayu, ta aitsü.
Yakünü Patiala House Court complex nung obendangertemi kaketshirtem, tesayurtem aser osangbenertem dak teka sangshiba aser police-i repranga dang toktsüba aija Rahul-i, “Osangbenertem dak azükba aser Delhi police-i ibaji menokdangba noksa ajak onoki nguogo. Item tatalokba ajanga International jenjang tashi nung India linük tenüng menüktsür,” ta ashi.
Tanü Tir ajurudang Rahul den Sachin Pilot aser Mallikarjun Kharge na densema Congress lenirtem kar liasü.
Rahul-i JNU kaketshirtem ajurutsü atema JNU campus-i aoba mapang pa dang wako tanak sayua liasü.
Lungkak aiter kaketshirtem den jembidang Rahul Gandhi-i Narendra Modi-i aniba NDA sorkar aitsüogo.
BJP National Tir, Amit Shah-i, Rahul-i linük ashioktsürtem pusemer ta aitsüba dak sentakba nung Gandhi-i, “Linük meimbaji kü azü nung lir. Iba linük atema ozü kibongi (Gandhi kidong) taküm tenla agütsüpet-agütsüba ni nguogo,” ta ashi.