India nung jenokdak maka !

Delhi nung Jawaharlal Nehru University Kaketshir Telongjem tir Wb.Kanhaiya Kumar  University nungi police-i pua bener ao aser pa anema benokba ken o jembitsü aser angadangtsü asoshi Delhi nung okadaki bener aodang okatsürtemi police ket nungi rakzüka Kumar dak azükba tensa jagi India sensosanger ajak mulung tipmedemi kümdaktsüogo. Taoba hopta nung Jawaharlal Nehru University (JNU) nung azünger kaketshirtem kari center sorkari küm ishika jakdang parliament ki amakba maparen nung nisung ka tenüng agi Afzal Guru alenseta südaktsüba anema senden ka ayongzüka agi aser iba sentong nung nisung kari India telongjem anema ayimten. Iba ayimtenba olaji maremzükteti center sorkari police yoka JNU kaketshirtem rongnung India anema ola adokertemji bushia pudaktsü. Item rongnungji JNU Students’ Union tir Kumar dena apu. Atangji, sorkar anema mesüra yimten telok ka anema ola adoktsü akok saka linük anema ola adokbaji temzüng anema aser linük asoshi tsükchir den kasa züngshitsüa akok. Ajisüaka, tang tashi nung JNUSU tir Kumar-i parnok kaketshirtem senden nung jembidang India anema ojang kata süoka mali ta angazüker. Ibaji shitak asü taiar tesülen obendangertemi ochi obendang agütsütsü imlaa atar. Kumarji aia liang teli, JNU nung kaketshirtemi India tatar hoho ki amakba nisung ka nem tasüba temerenshi agütsübaji tai liasü ta jembiba jagibo linük anema inyaker tabo mangatettsüla. Atangji, India ya alima tulu aser tamangba yimsü dang masü saka yimten telok aika tenteta aliba lima ka asünungji, aiben tebilemba aser tangatetba balala asür. Ibayongji, yimten nung telemtetba agidang ajaki mulungba dang agitsü ta masü saka teimbai mesüra asemsü nung anasüi mulungba nung telemtetba agitsüsa temzüng lateta lir. Aji oda, koba mapa nung südir süaka kari nunga ta asüyongbo teimbai mulungba nung aobaji democracy yimsü lir. Iba amaji aremzüktepa telok tuluba o tilaba na külemi moutera India ama lima ka nung democracy yimsü ya takok ngua moutettsü. Tanü India nung tebilemtsü tulutibaji telok tulubai tilaba dang maremzüker, anungji telok tulubai ashibaji mangara taküm lendong nung lir. Ibayongji, tawa Hyderabad Central University nung kin tila nungi aruba kaketshir ta tenüng agi Rohith Vemula pasasa pei taküm agitsüsa küma adok ta jembir. Iba kasaji JNU nung ataloker. Aji oda, tanga yimsü amangertembo Hindu yimsü bushia arura junger saka Hindu yimsü amangertembo Khristan kümra ozüng raksar asütsü ta asüba tangatetba agi India lima tesem aika nung timtem adokdagi. Chiyongtsü nunga dena nashishi achiba dang masü saka bener senzütsübaji ozüng rakasaba mapa ka asütsüsa temzüng lateta aliba India lima nung nashishi achirtem tali tasak kümogo. Iba amaji tamangba yimsü aser chiyongtsü nungi tenzüka nisung karbo police ket nunga mekümzükteti okadak obendangertemi repranga lia zükdaktsütsüsa atalokbaji telok tilaba purtem asoshibo India lima nung tejenokdak maka akümba den kasa asütsü. India telongjem meraksai alitsü asoshi tebilemtsü tulutibaji telok tilatem nungi masü saka telok tuluba koba teloki Mahatma Gandhi kasetsang Nathuram Godse nem konang naroküm agüja külemner, ibajiang shisabolutsüka bilemer. Aji oda, India nunger ajaki India ya pei lima ta bilema, Rabindranath Tagore-i ashi ama, tetsübu aser tarendak kecha maka nümadangdanga pei lima nung  tekolak angüma atur senzütettsüsa yutettsübaji yimten telok ajak khuret aser teinyaktsü asütsüla. Tanübo sensosangertem obendangdaka mejenoktetter, saka India lima yimti yimdong ajak nung senso dang masü bendanger dena  tetsübu makai sademsadema senzütettsüla. Iba ama India lima ka meyutetra, taoba Russia telongjem USSR amato, India-a, memenui loksaa oa adoktsü. Iba ama anogo ka agi menepa arur asü ta bilemtsüsa aritepa tatalokba aika atalokdagi.