Delhi Assembly-i BJP MLA, O P Sharma agientsü benoktsü

New Delhi, February 19 (Agenciec): AAP MLA tetsür ka anema o tashishitsü o jembiba dak sentakba nung Delhi Assembly nung Ethics Committee-i BJP MLA, O P Sharma House züngsem nungi agientsü atema benoktsü lemtetogo.

Tang mezüng BJP MLA, Sharma ya tashiyim amshia teka sangshiba ken o nung yashi puogo.

Yaküm November ita nung Assembly telung nung Sharma-i AAP MLA, Alka Lamba anema o tamajung jembiba atema Delhi Assembly Speaker, Ram Niwas Goel-i pa Winter senden piyong anenja liasü. Iba ken o ji maneni bushisüngdangtsü atema Goel-i Ethics Committee matsüngdang benoka liasü.

Taruba ita Budget Session nung Ethics Committee-i OP Sharma anentsütsü atema benoktsü akok.

Parnokisa ashiba agi, BJP MLA Sharma ya mapang-mapang shia aibelener ka lir aser pai item atemaji tatok memeshir.

“Lamba dang tatok meshitsü atema senden aika nung Committee-i Sharma nem maongka agütsüogo, ajisüaka pai tatok meshitsü memelunger,” ta osang ka ajanga ashi.

“Iba dak sentakba nung BJP MLA ji Delhi Assembly nungi agientsü atema benoktsü committee-i lemtetogo,” ta kasa osang ajanga ashi.

December ita nunga Budget senden alidang Sharma-i microphone ka raksatsüba asoshi pa itasen nungi temenok katitsü lemteta liasü.

Tang tesüsa Hombarnüa Patiala House court nung Sharma-i CPI züngsem ka dak azük, aser iba ken o nung yashi pa apu saka bail nung chioka lir.