New Chumukedima anasa AR-i NSCN (K) züngsem ka kahset

Dimapur, February 19 (TYO) : February 18, 2016 nü New Chumukedima yim anasa sepaitem den kahtepdang NSCN (K) züngsem ka kahset.
Dimapur, Chumukedima aser NH- 29 anasa NSCN (K) telungpurtemi tashiyim agi sen saruba mapa tenzüktsü meranger ta osang tejangja kar angazükba sülen, 37 Assam Rifles-i telungpurtem mita aodang Vihoshe Ayee’er jabaso Lieutenant Inato Ayee kahset, ta AR sangdong ka nung metetdaktsü.
February 18 nü Paglapahar aser Razephema tesem nung sepaitemi telungpur mita ao aser aonung 9:00 ako meta Rezephema nungi Paglapahar apu leni aoba lenmang nung NSCN (K) telungpur Inato Ayee-i sepaitem dak injang kahloktsü, ta sangdong nung shia lir.
Idangji sepaitemi telungpurji kahset aser pa ket nungi 9 mm Pistol ka den injang, hand grenades, Lathod Rounds aser tanga osettem angu. Sepaitemi tasümang den külemi osettemji Medziphema Police Station ket nung agütsüogo, ta Assam Rifles sangdong nungsa metetdaktsü.
NSCN (K) nung Lieutenant Inato Ayee kahsetba aser osettem aika apuba ajanga NSCN (K)-i NH- 29 nung ozüng alema mapa inyaktsü aliba noktangogo. Tawa tu Brigadier Akaho Sema-i asür Inato Ayee ji Zunheboto nung Tax Collection In Charge shim ta osang angazüker. Chumukedima nung tashiyim agi sen arutsü atema pa yokba asütsü akok, ta AR sangdong nungsa shia lir.
2013/ 2014 tsüngda Inato Ayee ji tang NSCN (K) nung Finance Secretary inyaker Brigadier Akaho Sema indang body guard liasü, ta Assam Rifles-isa metetdaktsü.