Kanhaiya Kumar ya shiba (?)

Bihar, Begusarai district kübok Bihat yim nungi Jaishankar Singh aser Meena Devin na jabaso ana rongnung tanubosang, Kanhaiya Kumar ya Communist Party of India (CPI) indang student wing- All India Students Federation (AISF) lenir aser Jawaharlal Nehru University Students’ Union (JNUSU) Tir lir. 2002 küm pa school education renemba sülen par state yimtiba, Patna nung Commerce azüng aser idangji AISF nung aden. Post graduation sülen pa Delhi-i oa JNU nung tang African studies nung PhD tagitak lir. 2015 küm Sept. ita nung Kanhaiya-i AISA, ABVP, SFI aser NSU candidate tem madak takok ngua AISF nungi tang mezüngbuba JNUSU Tir aküm. Kanhaiya Kumar o jembitsü nung kanga tsüngrotasong, ibayongji pai JNSU Tir menden alangzüktet ta aikati jembir. 2001 küm Parliament amakba ken o nung Afzal Guru aija alenseta südaktsüba anema Feb. 09, 2016 nü JNU kaketshir kari sentong ka ayongzüka alidang India anema yimyim ayim ta tai tonglokja Feb. 12 nü police-i Kanhaiya densema kaketshir kar apuba sülen Feb. 13 nü pa anema ken o benok. Ajisüaka paibo pai linük anema yimyim mayim aser linük telongjem raksatsüsa kecha meinyak ta ashir. Paisa, “Iba sentong nung yimyim ayimba nungji ni maden. Ni Linük Temzüng nung amanger aser Kashmir ya India shilem ka, ta ni teti jembia arur,” ta shiogo. Feb. 10 nü pai, “Linük meimer ka, ta asütsü atema onoki RSS nungi certificate menüngdaker. Onok iba linük nungi lir aser India litsü meimertem lir. Onoki iba linük nung nütsüng shilem 80, sensakertem atema rarar. Onok atema iba ya linük meimba lir. Onoki Babasaheb (B R Ambedkar) dak amanger. Onoki asen Linük Temzüng dak amanger. Onoki züngpong ashir- Sanghis (RSS) mesüra kari danga iba Linük Temzüng anema temeyong ka danga mekangra, ibajibo onoki magizüktettsü. Jhandelwala aser Nagpur (RSS headquarters) nung aliba Temzüng dak onoki mamanger,” ta jembi. Paisa, “Swamy (Subramanian)-i JNU nung Jihad tem lir ta jembir. JNU nung alirtemi rara proker ta pai jembir. JNU tenüng nung ni RSS pracharak tem dang yagi arur onok den o tokteptsü jazüker. RSS lipok otsüji British nunger den akhanga noktakba otsü lir. Aser tanübo item (RSS) linük ashioktsürtemi linük meimba certificates lemtsür,” ta aitsüba densema linük nung ajak nem kasa temeten magütsüba aser sorkar kijai tashi amshitsü merangba anema jembi. Kanhaiya ya March 2 tashi tepuokdak ayutsü okadaki tetuyuba agütsüogo. Pai Supreme Court dang bail nung chioktsü atema temepishiba agütsü, ajisüaka iba temepishibaji High court nung angadangtsü SC-i tuyuogo. Makamait kibong ka nungi kanga nüngtugu kaket reju ka nung lenir, Kanhaiya-i jembiba onük ajungaji züngdangra pai jembiba oji linük anema masü saka RSS aser sorkar anema ochi o jembiba ama angateter. Ajisüaka iba obendangji okadak ang agütsütsü. JNU ken o dak sentakba nung India Today group consulting editor aser kaketzülur nüngtugu, Rajdeep Sardesai-i, “Atangji, ni India anemer ka, kechiyong linük onük nung ni anemsü agi mejembir. Afzal Guru pusema jembibaji linük anemba ka süra, Jammu & Kashmir nung PDP-BJP teloktep nungi taoba Cabinet züngsem tesadang kabo aitsütsü,” ta shiogo. Kümshia January 30 nü India nungeri Mahatma Gandhi asüba anogo nung mangyimdang Hindu Mahasabha telokibo Mahatma Gandhi tepsetsang, Nathuram Godse ang tushir, süra iba telokji linük anemer telok ka asü (?) BJP MP, Sakshi Maharaj-i Godse pusema jembibajia linük anemba asü linük meimba ka ta züngshitsü (?) Ibaji yimtenren tashi apir lemtettsü asü (?) ta Rajdeep-i tasüngdangba kaogo. Alima nung democracy tulutiba linük, India nung pei tebilemba sademsadema jembibaji ‘ozüng alema inyakba’, ochi jembibaji ‘tasa tamajung’, linük meimbaji ‘linük anemba’ ta züngshira atangji iba linük ya tanük küma ajasatsü. 1990s mapang nung iba linük yimtenren nung secular aser secular masüba tangatetba na tsüngda telemsa adoka liasü aser tang ano linük meimba aser linük anemba tangatetba na tsüngda telemsa adokogo.