Kalikho Pul Arunachal Pradesh CM tenangzükba agiogo

Guwahati, February 19 (Agencies): Hokolbar nikongdang Arunachal Pradesh nung President’s Rule agienba sülen ghonda ishika tsüngda Congress Party nungi mulung masüba lenir, Kalikho Pul Arunachal Pradesh chief minister 9 buba inyaktsü atema tenangzükba agiogo. Itanagar, Raj Bhavan nung Angh, KP Rajkhowa-i ketdangsüa pa nem kulizüng agidaktsü.
Congress nung mulung masüba MLA tem dak alia BJP MLA 11 aser Independent MLA anati nungita Pul-i CM menden nguogo.
Taoba mapang state finance minister aser health minister, arishi küm 47, Kalikho Pul ya Hayuliang assembly constituency nungi lir aser party dang mulung masüba Congress MLA tem, BJP MLA tem aser independent MLA temi yaküm December 17 nü assembly nung pa House lenir aser chief minister shima liasü. Iba senden nungji Congress nungi taoba chief minister Nabam Tuki pusemertembo maden.
Iba sülen January 26 nü state nung President’s Rule benoka lia BJP teyari agia sorkar tasen akümba nokdangtsü asoshi tawa Tuki pusemertemi Supreme Court dang state nung PR magientsü mepishia liasü, ajisüaka court-i ibaji magizük.
State Congress Party Tir, Padi Richo-i Angh dang temepishiba shidi ka ajanga, mulung masüba Congress züngsemtem nem sorkar mekümdaktsütsüla, kechiyong Nabam Tuki ya democracy inyakyim ajanga CLP lenir shim, aser tang tashi CLP nung temelenshi mali, ta shia liasü.
Party-isa, Pul ya CLP lenir masü, anungji pai Congress sorkar akümtsü benokbaji tim masü, ta ashi.
Bodhbarnü Pul leniba nung züngsem 32-i Angh ajurua sorkar tasen akümtsü asüngdang, iba sülen Union cabinet-i state nung PR agientsü benoka liasü.