Britain-i EU nung züngsemtsü election June 23 nü agitsü: Cameron

London, February 20 (Agencies): Britain linüki European Union (EU) nung maneni züngsemtsü mesüra EU toktsütsü telemtetba agitsü asoshi nüburtem rong nung election sentong taküm, 2016 küm June ita 23 nü agitsü sentong renemba osang ka Britain Ato Kilonser, David Cameron-i tanü, Honibar nü sangoktsüogo.
“Britain maneni EU nung züngsemtsü mesüra toktsütsü ken o nung nüburtem nungi shisatsü agitsü election sentong taküm June ita 23 nü agitsü onük parliament nung benoktsü renemogo,” ta Cameron-i osang jangjashitsü.
“Ozü Britain-i tatem nung kechi telemtetba agitsü ni tang meshitettsü. Ajisüaka, Britian-i tajungba küma melenshiba EU nung maneni züngsemba ajanga ozü linük tali tashi taitba akümba den külemi, lendongtema tajemba ajurutsü ta nibo tamang akar,” ta pai metetdaktsü.
Tanüngba EU lenirtem den Belgium kübok Brussels yimti nung tongti senden ka amenba sülen Cameron-i tanü iba olenji sangoktsü.
Cameron-i tanepa par cabinet yimsüsürtem den senden ka amen aser par Britain EU nung maneni züngsemtsü telemtetba agitsü asoshi yimsüsürtemi o pangjemba osanga jangjaogo.