Syria sorkar anemertemi hopta 2-3 shi meraratsü nangzüker

Syria kübok Idlib province nung sorkar anemertemi agia aliba Maaret al-Numan jila nung Russia’er mitkar tayimtsütemi anüng nungi bomb tsükdakja asemben tashi atonga amakba sülen gari aser nisung aliba kanga mejungi poksar aliba noksa ka yangi angur. (Maaret al-Numan, February 20)

Geneva, February 20 (Agencies): Syria Tir, Bashar al-Assad-i aniba Syria sorkar anemertemi taruba hopta 2-3 shi tongpang merarai yimjung nung alitsü nangzükba osang ka tanü, Honibar nü metetdaktsüogo.
Ajisüaka, Assad pusemba Russia-i par mitkar tayimtsütem amshia amakba maparen inyakba, Syria o Russia mitkartemi sorkar anemertemi agia aliba tesemtem tanaben agishitsü merangba aser timtem toushi ajurushia alir nüburtem nem nungdakba chiyongtsü aser osettsüset tongtsü nung dang iba tenangzükbaji mapa küma inyaktsü ta parnoki metetdaktsü.
Russia-i yaküm, 2015 küm September ita nungi tenzüka par mitkar tayimtsütem yoka sorkar anemer teseptem amaktsü tenzükba ajanga Assad-i aniba sorkar mitkartemi taoba küm 5 tejaklen nungi tenzükba Syria tongpang nung joko takok angutsü tenzüka lr.
Syria nung mangatettep adoka tongpang kanga sashia rarabaren anenja par linük nung yimtenren tebentetbaren lidaktsütsü nükjidong nung United Nations (UN) densema, alima tashi abenba tentet aser linük lenirtemi ayonger Syria yimjung senden aiben menogo saka tanü tashi nung item sendentemi takok monguteti lir.
Tetsür aser tila tanurtem densema, Syria sorkari par tepuokdak puoka alir nisungtema chioktsü asoshi sorkar anemertemi takhangba benoka lir.
Ano külen, Syria nung tongpang rarabaren anentsütsü nükjidong nung Russia aser US nati tongti shilem agia Switzerland kübok Geneva nung Syria den sentakba tongti UN senden ka amenba osanga jangjaogo.
Syria nung mangatettep tulu adoka tongpang raratsü tenzüker tanü tashi nung sorkar mitkartemi Islamic State (IS) kiralongrar telok aser sorkar anemertem ket nungi tanaben agishitsü merangba tesem 15 shi nung nisung 486,700 shi timtem toushi tulu ajurua aliba aser chiyongtsü aser mozü mora densema, nungdakba teyari osettsüset mongtettsütetba tesemtem nung nisung million 4.6 shi ayawara tia ajurua aliba osang ka UN-isa metetdaktsüogo.