Lungkak aitdang 5 süogo; Maneni lungkak aittsü

Chandigarh, Feb. 20 (Agencies): Honibarnüa Jat kin-i Other Backward Classes (OBC) kübok parnok nem sorkar mapa balala nung shilem wazüka yutsütsü takhangba agüja lungkak aitdang sepaitemi injang yoka Rohtak aser Jhajjar district tem nungi nisung pezü tashi süogo, aser tanü tasürtem densema tang tashi nung nisung pongu süogo.
Ano tesem kar nungbo Jat aser Jat masüba nisungtem tsüngda rara adoka liasü.
Rohtak nung hospital ketdangsertemi, “Ghonda ka tejaklen nisung ana PGIMS tonga anir arudangbo sür liasü. Kanga mejungi yirua alir ka dak operation agi saka pa-a süogo,” ta ashi.
“Nisung ka injang agi tekolak yirur Jhajjar civil hospital-i anir arudang len tom nung asü. Ano injang agi yirur nisung trok PGIMS-i anir aotsü tuyuogo aser nisung ka Jhajjar civil hospital nung yaridar,” ta hospital ketdangser kati ashi.
District ana nungjagi injang agi yiruba nisung 14 PGIMS-i anir oa liasü, aser parnok rongnung nisung asembo kanga mejungi lir.
Tanü Haryana Chief Minister, Manohar Lal Khattar-i, “Sorkari nenoki akhangbatem agizükogo, anungji nenok pei kidangi meyipa oang,” ta metetdaktsü.
Ajisüaka Jat lenir aikati, OBC kübok Jat kin züngsemba indang ozüng ka sorkari meyanglu tashi lungkak aittsü ta shiogo.
Jat lenirtemisa yashi lungkak aitdang asür kibong nem sorkari senotsü teyari lakh 50 agütsütsüla aser par kibong züngsem ka nem sorkar mapa agütsütsüla ta takhangba agütsüogo.
Osangbenertem den jembidang All India Jat Aarakshan Sangarsh Samiti National Tir, Yashapal Malik-i, “Jat nunger nem shilem wazüka yutsüba ozüng ka state sorkari meyanglu tashi onoki lungkak aitba manentsü,” ta ashi.
Paisa, “Khattar-i sangdong ka kija agütsübaji onoki magizüktsü. Tamasa sorkari ozüng ka yanglutsüla. Iba atemaji Assembly nung sorkari Bill ka agizüktsüla,” ta shisem.