2022 küm tashi nung sensaker atema ki crore 5 sütsütsü: PM Modi

Kurubhat (Chattisgarh), February 21, 2016: Deobarnü Chhatissgarh, Kurubhat nung Ato kilonser, Narendra Modi-i ‘Shyama Prasad Mukherji National Rurban Mission’ lapoktsüba noksa nung angur. Noksa nungsa state Chief Minister, Dr. Raman Singh aser Minister of State for Chemicals & Fertilizers, Hansraj Gangaram Ahir nata angur. 

Naya Raipur (Chhattisgarh), Feb. 21 (Agencies): Deobarnü Ato kilonser, Narendra Modi-i Chhattisgarh, Naya Raipur nung ‘Pradhan Mantri Awas Yojana’ atema lung azüngtsüba sülen lokti senden nung jembidang, sensakertem asoshi 2022 küm tashi nung ki crioore pongu yaglutsütsü, ta metetdaktsü.
Paisa, teka mapa balala ashitsüji tongtibang ta ashiba den külemi lanurtemji mapa purapitetertem asütsüla, ta ashi.
Modi-i, India nüjiso ngur sülen joko küm aika arur ajisüaka tang tashi linük nung ki makar kibong crore pongu lir, ta metetedaktsü.
“Parnok rongnung kibong crore ana yimtitem nung lir aser kibong crore asem yimtsüngtem nung lir. India nüjiso ngur küm 75 ajungba benjungmung amungba küm, 2022 küm tashi nung India linükji koma ka südaktsüner, ibaji India nunger nisung shia shisadangtsüla,” ta Ato kilonser Modi-i ayongzük.
Sensakertem atema 2022 küm tashi nungbo ki crore pongu yanglutsütsü atema Centre sorkar aser state sorkartem külemi senteper inyaktsü, ta pai ashi.
“Iba ya terenlok project ka masütsü. Iba project ya sensakertem mangdang tashi itdaktsütsü atema benoker,” ta pai ashi.
“Iba project ajanga mapa tazüng aika adoktsü, kechiyong iba project atema cement aser lungro densema kisü-jensüba oset jenti nüngdaktsü,” ta pai ashi.
Chhattisgarh sorkari benokba skill development dak sentakba nung Modi-i, “Asen lanurtemji teka mapa ashirtem asütsüla aser mapa tasen purapitetertem asütsüla,” ta ashi.
Tanü Modi-i Chhattisgarh nung Raipur aser Rajnandgaon district na semdanga project aika tenzüktsüogo.