Haryana nung lungkak aiter nisung 10 süogo, 150 yiruogo

February 21, 2016 nü Haryana state kübok Bhiwani aser Sonipat district na nung Jats nunger lungkak aitertem aser security sepaitem tsüngda raratepba noksa ka yangi angur. 

Chandigarh (Haryana), February 21 (Agencies): Haryana nung Jats kin-i Other Backward Classes (OBC) category kübok sorkar mapa balala parnok nem wazüka yutsütsü takhangba agüja lungkak aitba mapang tajemba agi nisung 10 süogo aser nisung 150 dak tema yiruogo, ta Haryana Director General of Police (DGP), Y.P. Singhal-i Deobarnü metetdaktsü.
Osangbenertem den jembidang Singhal-i, state nung Rohtak, Bhiwani aser Jhajjar district tem tamajungba kongshia lir, ta ashi.
“Tang tashi nung nisung 10 asüba aser nisung 150 jungnüa yiruba osang lir. Yasüng (Honibar) nungibo nisung asüba osang mali,” ta pai ashi.
Haryana nung Jat kin-i Deobarnü tashi nung anogo 8 nübuba lungkak aiter, aser nisung merirjang aika timtemtepdar.
Lungkak sashia aitba ajanga state tesem ajak mejungi kongshiogo.
Dehi nungi senzüba train ajak thinenogo aser Haryana süi aoba National highway tesem aika lungkak aitertemi mokdanga lir.
Jat lungkak aitba ajanga north tsütsü aliba state tem nung train 1000 mesenzür aser train 736 thinenogo. Iba den külemi train 105 lenmang tangaleni paitoka senzü, train station 10 rongtoktsü, railway engine ana aser track machines raksatsüba den külemi tesem aika nung train jajaba lenmang kakteta raksatsü. Item kuli ajungaji ajanga Indian railway sen crore 200 dak tema takoksa nguogo.
Item kuli ajanga tayimtsü ticket nung jenjang kanga tuogo. Chandigarh nungi Delhi tashi aotsü atema tayimtsü ticket ka jenjangji sen 25,000 nungi sen 55,000 tashi tuogo.
DGP-i, sepaitem atema tongtibangba mapaji, Delhi dangi tzü yoktsü mapa asütsü, ta ashi.
Honibar nü lungkak aitertemi Delhi indang tzü supply raksatsü, ibayongji linük yimtiba Delhi nüburtem tzü agi timtemdar.
State dangi yoka aliba army aser Haryana police na tsüngda amalitepa meinyaker ta osang prokba dak sentakba nung DGP-i, “Amalitep mali ta asüba osangji tai. Army aser Haryana Police na tsüngda kanga junga amalitepa inyaker. Civil ketdangsertem den yariteptsü atema army temji yok,” ta ashi.
DGP-isa, security sepaitemi timtem agi kongshia aliba district tem nung asameyang tajung yangluogo aser lungkak aitertemi nokdanga aliba National Highway 1 den tanga highway tem lapoktsü atema inyakdar, ta ashi.
Singhal-i, army column 69 Haryana tongogo aser timtem agi kongshia aliba district temi yokogo, talisa Rohtak aser Jhajjar nati army aika yokogo, ta ashi.
Iba rara tenzüker ken o 291 tashi benokogo aser nisung 45 puogo, ta paisa metetdaktsü.
Honibarnüa lungkak aitertemi sorkar aser nija meyong gari aser kiojen nung mi senoka rongtoktsüba ajanga sen crore aika takoksa nguogo.
Tang Hisar, Sonipat aser Jind jilatem nung curfew benokogo. Rohtak, Bhiwani aser Jhajjar jilatem nungbo Hokolbar nikongdang nungi curfew benoka liasü. National Highway No.1 (NH-1) lenmang ajanga Haryana, Punjab, Himachal Pradesh aser Jammu & Kashmir state tem Delhi den sentakteper, aser iba lenmang ya Sonipat aser Panipat districts nung lungkak aitertem mokdanga lir.
OBC kübok Jats-i reservation akhangba manentsü ta reprangteta yashi Haryana nung BJP sorkari, Jat kini akhangbatem agizükogo, ta metetdakja liasü.
State Chief Minister, Manohar Lal Khattar-i, “Sorkari nenoki akhangbatem agizükogo, anungji nenok pei kidangi meyipa oang,” ta yashi metetdaktsü.
Ajisüaka Jats lenirtemi, OBC nung Jats züngsemba indang ozüng ka assembly nung sorkari magizük tashi parnoki maneni lungkak aittsü ta metetdaktsüogo.