Mon nung Solar Lamp angati lema agütsü

Dimapur, February 21 (TYO) : Mon Forest Division-i acha-ayanga Nynynu yimdak solar lamp alemba sentong agi. Iba sentong nung Longshen Forest Range kübok aliba Wetting, L/Wasa aser Longzang yimtsüngtem nungi Village Development Board züngsemtem aden.
Mon kübok meta talangka pilar aliba tesemtem nung alir kilen shia nem solar lamp angati lema agütsüogo aser tanabuba shilem nung ano tanga yimtsüng 6-7 ka nem kasa lema agütsütsü sentong lir.
Mumbai nungi NGO, Eco-Solutions-i solar lamp tenla agütsüba ajanga electric maliba tesemtem nung solar lamp agütsüteter.
Eco-Solutions atema Indian Co-ordinator, Yatendra Agarwal-i ashiba agi, parnoki Indo-Burma arrtsülen alirtem electric manguba dang masü lenmang, water supply, health care amala maliba osang angashidang kanga temulung raksa aser iba jagi solar lamps 2,000 angati agütsütsü mulungtet.
Meta kanga talangka pilar aliba asüba agi India mesüra Myanmar nungi terenlok manguba tesemtem nung alir yaritsü atema Forest Department-i mapa tilaka atonga inyaker, ta Divisional Forest Officer, Mon Division-i sangdong ka nung metetdaktsü.
Ngnynu yimtsüng nung Chief Angh-i solar lamps angurtem tenüng nung o jembidang Forest Department aser Mumbai nungi NGO dang pelaba metetdaktsü.