Tatar senden nung Nagaland Lokayukta Bill 2015 onük benokogo

Kohima, July 23 (TYO): Ochimashi inyakba ken o bushisüngdangtsü nükjidong nung Nagaland Chief Minister, T. R. Zeliang-i Nagaland Lokayukta Bill 2015 Tatar senden nung tanü Brehostibar nü benokogo.
“India kübok densemba State balala nung Lokyukta Act benoktsü asoshi Lokpal & Lokayukta Act, 2013 (Act No.1), 2014 kübok arla 63 nung renemja aliba ama, Nagaland nunga ochimashi inyakba ken o bushisüngdangtsü lenmang sadema lapoktsütsü nükjidong nung Nagaland sorkari Nagaland Lokayukta Bill, 2015 onük Tatar senden nung benoktsüsa akümer,” ta Zeliang-i metetdaktsü.
Ochimashi inyakba ken o benokeri benokba ken o ozüng benshir telok mashikati agizüka kasaji bentettsüra; mesüra India linük temzüng kübok 2 buba Schedule den sentakba ken o tembo iba Lokayuka tenteti magizüktsü asoshi Lokpal & Lokayukta Act, 2013 (Act No.1), 2014 nung lateta lir ta pai ashi.
Lokayukta mesüra Upa-Lokayukta-i Public Servants (Inquiries) Act, 1850 aser Commissions of Inquiry Act, 1952 temzüngi melaba ama, State mesüra Centre sorkari bushisüngdang agitsü ozüng agüja aliba ken o ka danga magizüktsü.
Ano, arla 30 nung lateta aliba ama, Nagaland nung tentetba Lokayukta-i Nagaland kübok inyakba ochimashi ken o tem dang agizüktsü.
Ochimashi inyakba sülen küm 5 abensadokba; mesüra metpuri pa anema ochimashi inyakba ken o benoka osang meteta kümer ita 12 süir sülen benokba ken o tema Lokayukta-i magizüktsü.
Ajisüaka, atazüktsüba mapang nung ken o mebenoktettsüsa tia ajuruba kuli tejangja sayutetra, Lokayukta-i atazüktsüba mapang süir benokba ken o agizüktsü.
Ozüng amshirtemi parnok nem agütsüba tashi ochishia mamshiba kuli tejangja agi nungitba ken o dak alaka ozüng amshirtemi inyaksangshiba anema benokba ken o Lokayukta-i agizüka mebenshitettsü.
“Tan benokba Nagaland Lokayukta Bill 2015 den sentakba onük angadanga kasaji ozüng küma agizüktsü mesüra magizüktsü olemtep sentong tan July ita 24 nü agitsü,” ta Tatar Onir, Chotisuh Sazo-i tatem nung metetdakja liasü.