Tanur maliba school !

Nagaland nung tesüngmangtsü mapatem aika lir aser item tesüngmangtsütem rongnung tesüngmangtsü kaji school nung tazünger mali ser School Education department-i tesayurtem ayuba mapa ya ka asütsü. Iba tesüngmangtsü tebilemtsü dak sendakba maparen nung tawa Nagaland School Education minister-i school-tem ajak jungjunga repranga shitak anepalutsü asoshi temulungtetba aser terenemba osang ka metetdaktsüba asenoki angashiogo. Ajisüaka, ano tesüngmangtsüka kaji iba osang metetdaktsüli School Education department-i tanur tazünger maliba school-temi tesayurtem tasen shimer yokba osang angashir. Item tesayurtem asoshibo mapai mao ita sen agitsüba tajung asütsüa akok saka iba jagi Nagaland nung tsürabur aser tanurtem aika akoksar. School Education department-ia Nagaland nung tanur tazünger maliba school aika nung tesayur angati ita sen chia kazüba indang meteta lir. Ano, tesem kar nungbo tanur tazünger maliba dang masü saka school ki dena maliba indang School Education department-i meteta lir. Ajisüaka, item tesayurtemji bushir tesayur peria maliba school-temi yoktsü melen ano tazünger maliba school-temisa tesayurtem yokpet yokbaji tekolok shisatsü shitak adenba nüchi nisungi inyakerbo memesük. Nagaland nung government school tapu ana lir, school kar nung tanur tazünger mali saka tesayurbo lir aser kar nungbo tanur tazünger lir saka tesayur peria mali. Anungji, School Education department atema tang rongdak nüngdakji tanur tazünger maliba school-tem nung mapa maka tezüdanga aliba tesayurtemji tazüngerbo lir saka tesayur agi meperiba school-tem dang jagi yoktsüla. Iba tebilemtsü ya bilemdanga jembitsü asoshi taoba hopta nung asenoki iba osangkaket nung, “School tanur tazünger maliba government school ajak shibang nunga koma süla ?” ta asüngdangtepogo. Iba telangzüba nung teimbai shibang nung jungla ta langzüogo. Ibaji shitak kechiyong tazünger tanur mali ser tesayurtem yokbaji tesayurtem asoshijia takoksa lir, kechiyong taküm nung pai mesüra lai metetba aser jangraba mapatem meinyaktet mapang tajung süitemtsü. Atangji, asenoki jungjunga bilemdangra, tazünger tanur melira school-ji shibangba den kasa, ajisüaka school shibangba agi tesayurtem mapa nung anentsü ta masü saka tanur tazünger alidak oa sayutsü. Asenoki jungjunga bilemdangra, tanur tazünger maliba school-temji teimbaka yimtak yimtsüngtem nung asütsü aser tesayur agi meperiba school-temji sub-divission balala kübok town-tem nung mesüra lenlang aser tsüket nung aliba yimtsüngtem school nung asütsü. Anungji, tanur tazünger maliba school nung sayutsü yokba tesayurtemji anasatiba school kong tesayur agi meperir yangji yoktsüla. Atangji, yimtak-yimtsüngtem nung asüyonga tanur maliba agi masü saka sorkar school dak temulung malemba agi private school nung azünger asütsüa akok, anungji ibaji koktettsü atema Education Committee-i kanga temulung agüja inyaktsüla. Akhidangbo, sorkar school-tem ya Education department nungi yokba Inspector-temi dang repranga liasü, saka tanübo pei school peii reprangtsü asoshi school shia Education committee shimja lir, anungji ajungtsüla, kechiyong Education Committee-ji school kibur aser anogo shia parnoki repranga lia school lapoker aser shibanger. Koba yimtak südir süang tazünger tanur mali ser tesayur ayuba jagi kecha tajangzük aser temoatsü magütsütsü, anungji tesayurtemji temoatsü küma amshitettsüsa tazünger tanurtem alidak school-temi yoktsüsa School Education department-i kanga temulung agüja inyaktsüla. Sorkar school tajungba akümtsü atema tang aliba tesayurtem dang nungi tajungba tesayurtem menüngdaker saka school education department inyakyimang tajungba küma akangshitsü nüngdaker.