Kohima nung nisung meyirijang aika adenshia AFSPA agientsü takangba agütsü

Kohima, Jul 23 (TYO) : Tanü Brehostibar nü Kohima nung Naga Naga Students’ Federation (NSF) teloki India sepaitemi kaketshirtem khasetba mapa anema lokti senden ayongzükba sentong nung nisung meyirijang aika arua shilem agiogo.
Iba lokti senden ya Phek district kübok Wuzu nung July 16 nü sepaitemi school tanur ana khasetba anema ayongzükba liasü. Iba ama nisung khasetba mapaji aija jembidang, tanü lokti senden nung adenshirtemi Nagaland nungi tetsübutsü ozüng tamajung Armed Forces Special Powers Act (AFSPA) 1958 ageintsüla ta takangba agüja liasü.
Tanü senden nung shilem agirtem rongnung teimba kaketreju balala nungi arur kaketshirtem liasü. Parnoki ” Onoki yimjung aginür,” saka ” Army Rule maginer ” ta ayimtena liasü.
Iba senden ya Kohima Local Ground nung akaba sülen teloktiji angh nem tezüluba nung item takangbaji agütsütsü atema Raj Bhavan leni tetsüng agi atuba mapang, iba lenmang nung garia mejajateti mapang talangka anena liasü.
Kaketshirtemji angh alidak tonger külen NSF tir, Subenthung Lothai anir parnok tanishirtmi Nagaland angh P.B Acharya ajurua tezüluba ka agütsü. Iba tezüluba nung Wuzu nung nisung khasetertem nem temerenshi agütsütsü aser AFSPA ozüng agientsü atema takangba agüja liasü.
Iba kasa tezülubaji Chief Minister, Home Minister, Chief Secretary aser Director General of Police, Nagaland nema agütsüogo.
July 16, 2015 nü Wuzu nung atalokba lendong nung Assam Rifles purtemi kaketshir ana khaset. Tenaji ka Phor nunger Tüzali ( küm 14) aser kaji Wuzu nunger Aso ( küm 13) liasü.
Tanü iba lokti senden nung Naga Hoho, Naga Mothers’ Association, Naga People’s Movement for Human Rights, Pochury Students’ Union (PSU) aser Naga Students’ Federation teloktem tenüng nung teshimtet purtemi jembia liasü.