Arunachal nung media-i Statehood Day nung shilem magi

Itanagar (Arunachal Pradesh), February 21 (Agencies): Arunachal Pradesh nung tesüiba küm pezü tashi electronic aser print media nung advertisemet indang sen sorkari magütsüba anema lungkak aita state nung osangbenertemi 30buba Statehood Day benjungmung nung shilem magi, ta osang ka ajanga metetdaktsü.
Arunachal Press Club (APC) leniba kübok Arunachal Pradesh Union of Working Journalists (APUWJ) aser Arunachal Electronic Media Association (AEMA) osangbenertemi advertisement indang state sorkari agütsütsü aliba sentsüh magütsü tashi lungkak aittsü lemtet, ta APC Tir, Chopa Cheda-i ashi.
Yaküm November 2 nü osangbenertem teshimtet telok kati taoba state Chief minister, Nabam Tuki ajuruba mapang pai, hopta ka tsüngda sorkari sentsüh shilem 15 agütsütsü ta shia liasü, ta Cheda-i ashi. Ajisüaka senji mangu, ta paisa shisem.
Tuki-isa par ketdangsertem dang tanüngba sentsüh shilem 85 ji ita ka tsüngda agüjang ta tuyua liasü.
APC Tir-isa, aiben mepishiaka ketdangsertemi, talisa finance department (principal secretary aser secretary)-i osangbenertem aiben mesüzüka liasü, ta ashi.
Osangbeertem tenetet-isa Hokolbarnü Angh, JP Rajkhowa aser Chief secretary, Ramesh Negi na nem tezüluba nung temepishiba ka agütsüogo.
Ano tanga osang ka nung Honibarnü Ato kilonser Narendra Modi-i Arunachal Pradesh nüburtem dang salem osang ka lemsatepa twitter ajanga, “Statehood Day anogomung nung Arunachal nüburtem den salem lemsaeper. State terenlok atema ni sarasademtsür,” ta ashi.