Nagaland nung osangbenertemi sadema inyakner

Dimapur, Feb.21 (TYO): Tawa telok kati Nagaland nung adokba osangkaket ka anema yimjak nung jashiba metetdakja jembibaji kanga shisabolua bilemer, kechiyong iba ama mapa jagi osangbenertem inyaksangshi mesadem kümdaktsür ta sangdong ka ajanga Nagaland Press Association (NPA) aser yimozülurtemi metetdaktsüogo.
“Nükjidong tajung ka lia anema jembiba mapatembo junger aser iba jagi nübortemi mulungba yimten junga kümdaktsür, ajisüaka tebilemba ken o süoktepa jembitsü asoshi mapang magütsüi osangbenertem mapa aitsübaji ajak atema majung mapa ka tenzüker asütsü,” ta osangbenertem telongjemisa metetdaktsü.
Iba tangatetba nung kechi ken o mangatettepsa ali, itemji kati ka akümtsübutepa süoktepa jembir telatetba tajung kati arutsü imlar ta parnokisa metetdaktsü.
Nagaland nung ajaki pei khuret meteta osangtsüsang abenba mapa sadema inyaktettsü asoshi Nagaland sorkar, lokti tentettem, nübortem aser osangbenertem ajaki shilem tajung agidaktsüner ta NPA aser yimozülurtemisa metetdaktsü.
Nagaland nung osangbenertemi pei mapa aser khuret meteta lokti tenzüktsü asoshi tajung bilema aitsüba aser metongshitsüba onüktem ajak benoka jembitsü asoshi teti mulunga lir, ta parnokisa metetdaktsüogo.