Tasüba temerenshi magütsütsüla: Pope Francis

Vatican City, February 21 (Agencies): Deobarnü Pope Francis-i alima ajungalen tasüba temerenshi agientsü tayongzükba ka agüja, ‘Nai nisung metepsettsüla’ ozüng ya aibelenertem aser tai maketertem naprong atema kasa lir, ta ashi.
Tasüba temerenshi anema o taret kar amshia pai alima nung Catholic amanger yimtenren lenirtem dang taküm November ita nung tembangba Catholic Arogo indang Holy Year mapang nung tasüba temerenshi anema tasütait aser tatishitsü mapa kar sayutsüla, ta ayongzük.
St. Peter`s Square nung nisung merirjang aika madak jembidang pai, “Ni yimsüsürtem dang International jenjang tashi nung tasüba temerenshi intoktsü atema telemtetba agitsü mepishir,” ta ashi.
“Ozüng ‘Nai nisung metepsettsüla,’ ozüng ya tetemsü aser iba ya aibeneler aser tai maketertem naprong atema kasa,” ta pai ashi.
Küm noklang aika ken o tulu atemabo tasüba temerenshi agütsütsü züngsem billion 1.2 aliba Catholic Church-i melaa liasü, ajisüaka 2005 küm asür Pope John Paul mapang nungi iba tangatetbaji melenshiogo.
Küm asem tejaklen Francis pope shimba sülen pai tepouktak aika sema senzüogo, aser tang tesüsa taoba hopta Mexico nunga pai nisung puoka ayuba tesemtem tajungba yanglushitsü atema jembi.
“Khristan tem ajak aser temulungtetba tajung alirtemi tasüba temerenshi agientsü atema dang masü saka pei temeten makartem atema meimchiryim akhümtsübu sayua tepouktak tesemtem jenjang tajungba kümtsütsüla,” ta pai ashi.