Dimapur CVO complex nung SPCAs office lapok

Dimapur, February 22 (TYO) : February 22, 2016 nü Chief Veterinary Officer (CVO) office complex nung Director Nagaland Post, Ao Chuba Yaden-i Society for the Prevention of Cruelty to Animals (SPCAs) Dimapur Office lapoktsü.
Iba sentong nung Nagaland Post yimozülur Geoffrey Yaden-i tongti tesemdanger ama adentsüba liasü saka pa mapa kar nung mazüngba ajanga par jabaso Chuba Yaden-i shilem agi.
Chuba Yaden-i o jembidang, India Linük Temzüng Arrla 51(g) nung shirurutem wazüka ayutsü indang ozüng lateta aliba metetdaktsü.
SPCA atema kanga tongtipang teinyaktsü rongnung shirurutem anepalutsü atema mozüki lapoktsüba lir. SPCA nung tang teinyakdak mendenpurtemi mapa tajung inyakba ajanga linük nung Dimapur tetshitsü imlar, ta paisa shisem.
Sentong nung SDO (C) James Swu-i Dimapur DC & SPCAs Dimapur (Ex officio) president tenüng nung o jembidang CMO Dimapur-i SPCAs office lapoktsü tesem agütsüba atema pelaba metetdaktsü.
James Swu-isa, nisung ajaki aser talisa mulungtet teloktemi SPCA den yariteptsü mepishia metetdaktsü.
Sentong nung Rev. Brain L.John-i temoatsü meshia sarasadem, SPCAs Dimapur Vice president, Joseph Lemtur-i okila jembi aser CVO Dimapur & Hon Secretary SPCAs Dimapur (ex officio) Dr.Temsu Ozukum-i anküp tepela o jembi.
Sentong nung mendenji Executive Secretary SPCAs Dimapur Marian Rao liasü aser Deputy Commissioner of Police, Peseyie-a aden.