NSCN-IM asoshi tebilemdangtsü

Tawa Nagaland nungi Chief ministeri anir Naga yimten tebilemtsü latettsü asoshi Delhi tashi orr yangji yimten telok tapu balala nung tongti lenirtem ajurua senzür külen ano Kolkata tashi arua Trinamool Congress lenirtem den ajurua kasa tebilemtsü onük süoka jembibaji tanitebelem kanga agia inyakogo ta angatetter. Atangji, Naga yimten tebilemtsü ya India tatar hoho nung benoka jembir latettsübaji mapa temelabo masü. Ashiko, yimten telok kati mulungyonga anati memulungtsüa akok. Ibayongji, tatar hoho nung ken o mebenokdangyongi yimten lenirtem ajak ajurua senzüba jagi tamakoktsü kata takoktsü küma latettsü imlar. Iba tangatetba aser teimla nung Nagaland nungi yimsüsürtem oagi Delhi aser Kolkata nung tongtibang yimten lenirtem ajurua senzür aruogo. Tang tashi nung Naga yimten ken o latettsü asoshi India sorkar den jembiba telokjibo NSCN-IM purtem dang lir, anungji Nagaland nung yimsüsürtem oagi Delhi aser Kolkata nung India nunger yimten lenirtem den jembibaji India sorkar o NSCN-IM na tsüngda kechi onüksa renemer tatar hoho nung benokdir, ibaji pusema agizükdaktsüner ta mepishiba ken o ka asütsü südi. Tang tashi nungbo India sorkar o NSCN-IM na tsüngda koba tashika nung ken o renema aliar nübortemibo memetet saka Nagaland nung yimten yimsüsürtemibo meteta alitsü imlar. Aji oda, koba ama ken o ka tatar hoho nung benoktsü renema lidir liaka, Naga nunger ajak ajungtsü asoshi dang renema alitsü ta imlar. Ajisüaka, yangi tatidaktsü maparen kar lir aser item rongnung kaji, küm paikaya timtem lendong aser takoksa aika ajangshia arur külen tang tesüsa Naga yimten ken o India tatar hoho nung benoka latetba nunga Naga nunger tebang aser temulungjang memedemra, Naga nunger asoshi tiamakatiba mapangji aji asütsü. Iba ama anogo kaji majurutsüsa tang yongi Nagaland nung yimsüsürtemi ano maneni tanitebelem agia telok ajak ajurua senzütsübaji kanga tenüngdaktsü asütsü. Oagi Delhi aser Kolkata nung India nunger yimten lenirtemi yaritsü nangzükbaji tongtibang saka ano iba dang nungi tongtibangbaji Naga nunger tangatetba aser telongjemji asütsü. Iba tangatetba nung, tang jajaba amaji Nagaland nung yimten lenirtemi Naga nunger yimten telok ajak ajurua jembipet jembitsübaji kanga tenüngdaktsü mapa ka kümogo. Ano, iba dang nungi tongtibangba nüngdak mapa kaji, NSCN-IM teloki tanga Naga nunger yimtem teloktem ajurua parnok külem ser India sorkar den Naga yimten tebilemtsü ken o ya tatem küma jembidi ta shitettsüla. Tanü putu nung Naga yimten tebilemtsü ken o teti asoshi tipdema latettsü atema mozü tajungtibajibo aji asütsü. Ashiko, NSCN-IM telok asoshi aji mapa tasak asütsüa akok saka tanü Naga yimten tebilemtsü akoktsü asoshi mapa tasak saka arema meinyakra makoktsü aser maneptsü. Aji oda, NSCN-IM aser India sorkar na tsüngda jembiba aser renema aliba ken o ji Naga nunger tang aser tarutsü pututem asoshi tajung asütsüsa renema lira, tajungjibo ajak den külemi lemsaa agitsü menungnangtsüla. Yimten nungbo shibai tuluba kümner pa tilaba akümtsü saka shibai tila küma tangar tenzüktetter paji dang tulur akümer. Lashiba nung Yisuia yamaji dang shia lir aser alima nung asenok tenükia yamaji dang ataloka angur.  Yimten mapa nungbo, telok kati tenzük, kasa teloki jembi aser kasa teloki atem ta asüba nungji tangar kinunger teloktem aittsüsa kishi lapoka mali, anungji külemi melitettsü. Yimya agi tejaklen puri tesülen pur atatsüla aser tashi itta alirtemi tashimaitertem mesotsüla. Tera atateper ao nungbo külemi topur junga tonger külemi pelatepa alitsübaka ser nung, tejaklen purtemi mataba ajanga tesülen purtemi manidaktetra, tejaklen aser tesülen alirtem ajak asoshi jangramatemka asütsü. Iba tangatetba nung NSCN-IM teloki ano ken tanga Naga nunger yimten teloktem den külem ser India den Naga yimten ken o jembitsü aser tembangtsü asoshi merangdangra, iba jagiang India tatar hoho nung Naga yimten ken o ya tajungba latettettsü südi ta bilemer.