J&K nung rara temogo, kiralongrar 3 tepset

Srinagar, Feb. 22 (Agencies): Jammu & Kashmir, Srinagar tezülen Pampore nung sorkar reju, EDI building ka nung kiralongrar asem security sepaitemi longbanger liasü, aser parnok den ghonda 48 raraba sülen Hombar aonung par asemprong tepsetogo.
Iba rara nung captain ana densema Army para commando asem den tangar asem süogo.
Honibarnü 10 Para Special Forces officer arishi küm 23 Captain Pawan Kumar-i sepaitem anir building telungi aidang pa kahsetdaktsü aser Deobarnü Special Force battalion 9 Para nungi Captain Tushar Mahajan (26) aser Lance Naik, Om Prakash na tepset.
Captain Kumar asüpila sentong tanü Haryana nung par yimtak agiogo. Captain Mahajan tasümangji par jila Udhampur-i bener ao aser Om Prakash tasümangji Himachal Pradesh nung par yimtaki bener ogo.
Hombar anepdang army-i, iba building nungi nisung ajak ainshidaktsüogo ta metetdakja liasü. Police osang ajanga ashiba agi kiralongrartemji Pakistan nung amenoka aliba Lashkar-e-Taiba züngsemtem lir.
“Iba campus ya kanga tulu aser building asem lir. Ki tamentep shia takdang ka nungi ka ta mita aotsüla. Iba atemaji Specialised units nüngdaker, CRPF den külemi senteper inyakdar,” ta GOC 15 corps, Lt Gen Satish Dua-i metetdakja liasü.
Honibarnü Pampore tesem nung kiralongrartemi CRPF bus ka amakdang sepai ana tepset aser 11 yirutsüba sülen parnok jena orr Entrepreneurship Development Institute (EDI) nung atsüka liasü.
Kiralongrartem jagi CRPF bus amakba sülen EDI complex nung atsük. Iba building nungji kaketshir 100 dak tema entrepreneurship training tagitak liasü.