Mkg ADC & Administrator-i metetdaktsür

Dimapur, February 23 (TYO) : Mokokchung nung dokan kiburtemi weighing machine shitak ayutsüla aser talirtemia touzük shitak aser tajung alitsü merangtsüla, ta Mokokchung Additional Deputy Commissioner & Administrator, Bendangilila-i sangdong ka nung metetdaktsü.

Iba dak sendakba nung temulung masüba onük kar lira tekaratiba nung Mokokchung Municipal Council (MMC) office nem osang sangokjang, ta Bendangilila-isa sangdong nung shia lir.

Ano, hotel/ restaurant/tea stall ajak nung non-bio-degradable marok aser aosutem amshitsü tetuyuba agütsür aser waste box/dumping boxes nung endokba dak alaka lenmang mesüra kilentzü aodak mineral water bottle, disposal cup, chips packet amala meindoktsü nenshia metetdaktsür, ta laisa shisem.

Mokokchung Additional Deputy Commissioner & Administrator-isa azü metsürtem dang tesüiba mapang tetuyuba agütsüba ama azü alener metsütsü nenshia metetdaktsü aser aibelenertem ozüng tapet agi merenshitsü ta shisem.