Ringing Bells-i phone magütsütetra ozüngi melaba ama inyaktsü:Sorkar

New Delhi, February 23 (Agencies) : Alima nung smartphone dalangtiba ayoktsü nangzükba company, Ringing Bells inyakyim ajak sorkari kanga tenoka reprangdar aser parnoki sen 251 alang phone ji magütsütetra oaüngi melaba ama inyaktsü, ta Mongulbarnü Telecom Minister Ravi Shankar Prasad-i metetdaktsüogo.
“Ministry-i Ringing Bells ket nung BIS küli kaket lir mali aser iba phone ayoktsü asoshi parnok inyakyim koba tashi odar ibaji metetpelaogo aser iba dak sentakba nung parnok den ajurutepa jembishinüogo,” ta Prasad-i osangbenertem dang shiogo.
Tesülen tetsükdaktsü malutsü atema onoki yamaji inyak, ta pai shisem.
“Iba inyakyim nung tamakok kar danga alura parnok dak ozüngi melaba ama inyaktsü. Onoki parnok kanga mita reprangdar,” ta pai ashi.
I-T Department-ia parnok sen jenjang kanga junga mitdar aser Registrar of Companies (RoC) den iba inyakyim asoshi zülutepba shidi den tanga tezülutepba ajak meshia lir.
Iba dak sentakba nung Telecom Ministry-i dangi company anema osang aika aruogo. Indian Cellular Association-ia Ministry dang iba inyakyim telung tonga ia reprangtsü atema shiogo. Parnoki ashiba agi iba smartphone ya subsidy ajanga ayokyonga sen 3,500 teküpok agi magutsü.
Olulu aika adokaka nisung crore 6 dak temai iba phone jilia mangaogo.