DBHSS, Zubza nung “Discovery North East- A Cultural Yatra, 2016” amung

Dimapur, February 24 (TYO) : February 24, 2016 nü Don Bosco Higher Secondary School, Zubza nung “Discovery North East- A Cultural Yatra, 2016” sentong agi.
Iba sentong ya North East Zone Cultural Centre, Dimapur-i Art & Culture Department den yaritepa ayongzük.
Sentong nung tongti tesemdangerji Commandant 37th Assam Rifles, Col. Ananya Bonal liasü aser tetushi süa jaokerji Commandant 87 Battalion CRPF, Neeraj Yadav liasü.
Art & cultureji kanga tongtipang aser North-East nungertem külemi longjemer sobaliba balala benjungtepbaji linük asoshi tenüng tajung lir, ta Col. Ananya Bonal-i tongti tesemdanger o jembidang ashi.
Sentong nung Joint Director NEZCC, Talinokcha-i India nung Zonal Cultural Centre balala indang osang metetdaktsü aser pai ashiba agi NEZCC ajanga North Eastern State ti repranger.
Ministry of Culture, Government of India ajanga tongtipang sentong aika ayongzüka amunger aser item rongnung National Cultural Exchange program kanga tongtipang lir. Nagaland nunga Cultural Yatra 2016 mpa küma tenzükogo aser iba sentong ya jila aser yimtsüng 32 nung agitsü, ta Talinokcha-isa metetdaktsü.
Sentong nung Sechü V.C.C. Chairman, Mhasikhotuo Zhunyu-i tesentepertem pela agizük, Don Bosco Hr. Sec. School, Sechü Principal Fr. Samuel-i temoatsü meshia sarasadem aser Don Bosco Hr. Sec. School, Sechü kaketshirtemi ken ka aten.
Sobaliba sentong nung Madhya Pradesh nungi Badhai (SCZCC), Meghalaya nungi Ka Shad Mastieh, Arunachal Pradesh nungi Eme- Relo (Adi Community), Rajasthan nungi Chakari Dance (WZCC), Assam nungi Bihu Dance, Manipur nungi Thang- Ta aser Sechu Youth Organisation Cultural troupes o Sechu Zubza Youth Organisation nung yartsüngsangertemi shilem agia liasü.
Sentong nungsa yimdak tantsü-tambutem aser Department ketdangsertem, Social Activist, Niketu Iralu aser New Mexico nungi Dr. Vilasier Iralu o kinungtsü nungertem aden.