US o China nati N Korea anema benokba tenokdangbaren agizüktsü renemer

Washington, February 25 (Agencies): United Nations (UN)-i N Korea anema benokba tenokdangbaren agizüka kasaji nungitsü asoshi US aser China nati bangjemogo.
Alima ashi mangai N Korea-i tawa par tongpang nung amshitsü nuclear osettsüset aser long-range missile tendanga kadokba yong UN-i par linük anema tenokdangba sentong tasen benokshitsü renema lir.
Ajisüaka, tenokdangba sentong benokshitsü den sentakba osang tejangjabo alima dang tanü tashi metetdakja mali.
US semdangsang, China Foreign Minister, Wang Yi-i US Secretary of State, John Kerry den tan Mongolbar nü ajurutepba sülen US National Security Advisor, Susan Rice dena yashi, Bodbar nü ajurutepa senden amenba sülen par linük anati UN-i Pyongyang anema benokba tenokdangbaren agizüktsü nangzükteper lir.
UN-i tenokdangba sentong tasen benokshiba den külemi, alima ajungai ka küma lungjemer N Korea anemtsü nungdakba akümba osang ka US National Security Council otongdar, Ned Price-ia metetdaktsüogo.
Par linük anati tan agiba telemtetbaji UN senden nung benoktsü asoshi US-i renema lir.
N Korea den sentakba onük nung mapang talang ka tangatettep kati maruteti lir külen N Korea lenisang, Kim Jong Un-i par tongpang nung amshitsü nuclear osettsüset yanglua rizüngtsü mapatong anendaktsütsü nükjidong nung par linük anema rongsenren tenokdangba sentong tesashi benokba US linük aser Korean peninsula nung tensa mejungi mekümdaktsünüba yong N Korea den sentakba ken o ajunga tashiyim agi masü saka jembitepba ajanga dang bentettsü asoshi ayongba China linük nati tan tangatettep kati arur lir.
Tongpang nung amshitsü nuclear osettsüset tendangba den külemi, rocket aser missile-tema tendanga kadokba sülen UN-i 2006 küm nungi tenzüka tanü tashi N Korea anema tenokdangba sentong balala benoka lir.
US Tir, Barack Obama-ia par US-i Pyongyang anema tenokdangba sentong benokshitsü onük tan Bodbar nü agizükba osang jangjaogo.