Rio-i pa tazüngba jenjang jangjashitsü

Kohima, Feb. 25 (TYO) : Tawa nisung kari taoba Chief minister aser tang Lok sabha tatar (MP) Neipihu Rio-i pa tazüngba jenjang tiyazü talila enoksema amshi ta aija sangdongba osang ka jangjashitsüdang, pai kodanga pa tazüngba kuli kaket tiyazü meshia masüngdang ta Rio-i metetdaktsü.
2012 küm kü meyong degree certificate bushiaka mangu, anungji Kohima college nungi iba certificate-ji ka agütsütsü asüngdang, aser iba certificate agütsüdang parnoki aibelena
BA ta masü saka BA (Hons) ta yanglur agütsü. Iba aibelenji 2014 küm junga mereprangi Lok sabha election nung kü mapa nung yarirtemi enoka adok, anungji yamaji ser Retruning Officer dangi yok ta Rio-isa metetdaktsü.
Iba aibelenji October 2015 nugang putet, anungji idangjisa 08.10.2015 anogo nung Kohima College dangi iba aibenlenji melenshitsü asoshi yok aser yamaji parnoki melenshitsür agütsü. Item temelenshiba tazüngba kuli kakettemji affidavit nung zülur Chief Election Officer, Nagaland nem agütsüogo ta paisa metetdaktsü.
Tang tashi nung Nagaland sorkari adokba kaket aser Lok sabha nung 11.06.2014 nung adokba kaket ajak nung kü tazüngba jenjangji BA (Hons) ta masü B.A ta dang zülua lir ta paisa jangjashitsü.