‘Rocky’ film nung shilem agisang Tony Burton süogo

Los Angeles, February 26, 2016 : “Rocky” film tem nung Apollo Creed aser Rocky Balboa na dang tsüngteptsü sayusang, Tony Burton arishi küm 78 nung süogo. Pai Rocky film tem nung kangasa junga shilem agitetba ajanga nüburtemi kanga junga meteta aküm.

Pa mapang talangka temang manemi lir külen Brihostibarnü California nung asü, ta dailymail.co.uk ajanga metetdaktsü.

Arishi küm 78 tain, asür Tony ya taoba küm tepiyong mozü kidanglen senzüogo, ajisüka pa tashidak tejangja meputet.

Iba osang tejangja ya teno tanutsüla, Loretta Kelley-i metetdaktsü.

Rocky film nung Apollo ama shilem agisang, Carl Weathers-i, “RIP Tony Burton. Pa dak tejangraba aser sempet tajung aliba ajanga Rocky film kanga takok ngua liasü. #BePeace,” ta twitter ajanga lemsatep.

Rocky film tenet prong nung Tony-i shilem agi liasü.

Burton-i Rocky film tem nung tsüngtep sayur tajung, Tony ‘Duke’ Evers ama shilem agi. Mezüngbuba Rocky film ana nungbo pa ya Balboa tsükchir Apollo Creed indang tesayur ama shilem agia lir.

Ajisüaka iba sülen tasembuba nungibo Balboa indang tesayur akümer. Balboa shilem ya nübur ajaki meteta aliba nüngtugu actor Sylvester Stallone-i agi.

Tony Burton ya Flint, Michigan nungi lir. Pai 1955 aser ano 1957 kümtem nung Flint Golden Gloves light heavyweight takok ngua lir.

Pai ano “The Shining” aser “Stir Crazy” film tem nunga shilem agia lir.

Tony Burton appeared alongside Sylvester Stallone in six Rocky films